Jantzita ditugun katiusken azpian harriak irristatuz doaz gure pausoekin batera. Magal malkarrean goroldioak marrazten du paisaia. Argi-ilunetan dantzan dugu basopea begien aurrean, eta ura nonahi: goitik behera, amaigabea bailitzan, harri artetik ur-negarrean, lurraren gainazaletik leun, badoa... batek daki noraino. Urumea bailarako erreketan, ur-salto, harkaitz heze eta ur-begi blaituen artean bada altxor bat, eta orain du loratzeko garaia. Soldanella villosa. Gureak dira more koloreko iturburuak.