Gaur hasiko dira Karnabalak Goizuetan, astelehen eta astearte ederrei bidea eginez; eta egun haundia dute gaurkoa Astigarragan ere, Zirikoketa dibertimentuaren bigarren edizioarekin. Hernanin, mozorroen kalejira izango da.

Duela 120 urte, 1906ean, antolatu zen aurreneko aldiz Goizuetan 'La Fiesta del árbol' izeneko ekitaldia.
Hilabete batzuk lehenago, 1905ean, gauza bera egin zen Hernanin. Eskoletako umeak, irakasleak, alkatea, zinegotziak,
eliza-gizonak eta herritarrak arbolak landatzen aritu ziren festa giroan bi herrietako mendi magal jakinetan.

Arreta deitzen du, ordea, XX. mendearen hasieran bi herriek ia aldi berean hartu izana festa bera aurreneko aldiz
egiteko erabakia. Zuhaitzak, umeak, herritarrak, agintariak, literatura lehiaketak, musika eta bandera nazionalak tartean… kontuak bazuen bere misterioa; eta ez zen gutxiagorako. Izan ere, oso gureak sentitzen ditugun Goizuetako eta Hernaniko lehenbiziko Zuhaitz egunen jatorria ez dugu Urumeako bailaran bertan aurkituko. Atzera begiratu beharko dugu, eta urrutira: Madrilera eta Estatu Batuetara, hain zuzen ere.