Gaur arratsaldeko 19:00etan jokatuko dituzte bailarako bi taldeek Herriartekoaren final laurdenen itzulia. Palaz ariko da Astigarraga, Azkoitiaren aurka, Txomiñenean; eta Azpeitian ariko dira hernaniarrak, eskuz. Buelta eman beharko diote joaneko markagailuari, bai Astigarragak eta bai Hernanik. Zaila dute erronka, baina ez ezinezkoa.
Joanekoan, Hernanik etxean jokatu zuen, eta honakoak izan ziren emaitzak: 22-19 irabazi kadeteetan, 14-22 galdu jubeniletan eta 12-22 galdu nagusietan. Astigartarren kasuan, Urolan jokatu zuten joanekoa eta emaitzak hauexek izan ziren: 20-5 galdu kantxa osoko banakakoan, 6-20 irabazi binakakoan eta 20-6 galdu zazpi barruko banakakoan.
