Hernaniko saskibaloiko bigarren mailako gizonezkoak igoera fasean daude murgilduta, lehen mailara igotzeko ilusioarekin. Galdu egin zuten larunbateko norgehiagoka Andoainen, Zurruten aurka, 65-54. Hala ere, laugarrenak dira sailkapenean, beraz igoerarako play-offak jokatzeko postutan daude. Hurrengo jardunaldia apirilaren 18ko 16:00etan izango da, etxean, Antigua Luberriren aurka. Horrez gain, beste jardunaldi bat geratzen zaie hernaniarrei lehen lau postu horietan mantentzeko, eta play-offetara sailkatzeko.
Mundarroko gizonezkoek garaipena lortu zuten pasa den ostegunean Aldapeta Maria Ikastetxearen aurka, Donostian, 66-69. Lehenengo mailako jaitsiera fasea jokatzen ari dira astigartarrak, baina egoera lasaia dute, bigarrenak baitira sailkapenean. Hurrengo norgehiagoka apirilaren 15eko 20:15etan jokatuko dute, etxean, Easoren aurka. Hori azken bigarren partida izango dute moreek helburua lortzeko.
Astigarragako neskek ere lehen mailan jarraitzeko lehian jarraitzen dute. Ostiralean izandako partida irabazi egin zuten, etxean, Zasten aurka, 88-38. Azken jardunaldia baino ez zaie geratzen Mundarrokoei, eta helburua esku artean dute. Errenterian izango da, apirilaren 19an, 16:00etan, Ikuxma Estetika Oiarsoren aurka.
