Usadioz, sagardotegia elkartzeko, ospatzeko eta aisialdirako gunea izan da, non bolo-jokoek, tokak zein bertsolariek giro paregabea sortzen zuten.
XIX. mendearen erdialdetik hasita, gaur egunera arteko gertaera historikoak zein bitxikeriak ezagutarazi ditu erakusketak, besteak beste, erakusketari izenburua ematen dion 'A la yuklak, golpian bat' esaldiaren esanahia: Luis de Uranzuren Un pueblo en la frontera argitalpenean jasota dagoen bezala, Irungo usadioaren arabera sagardo edalontzia kolpe bakar batez edan behar zen, 'A la yuklak, golpian bat!' esanda.
Sagardoaren kulturak eta munduak izan duen bilakaera xehetasun haundiz azaltzen du erakusketak, Frankismo garaiko krisialditik igaro eta gaur egungo proposamen berritzaileetaraino iritsita.
Erakusketaz gain, sagardoaren kulturaz gozatzeko aisialdiko eskaintza zabala dago gaur egun. Sagardoetxea Museoan, esaterako, bisita gidatuak, sagardoari zein sagarrari buruzko ekitaldiak eta esperientziak eskaintzen dituzte.
Aditu batzuen arabera, litekeena da usadio hau izendatzeko erabiltzen dugun txotx hitzak zotzarekin zerikusirik ez izatea. Izan ere, 'Txotx Berria' irekitzen zenean, sagardoa kanilatik dastatzen zen. Horregatik, litekeena da usadiok 'xoxa' hitzarekin lotura handiagoa izatea, hura baitzen sagardo edalontzia ordaintzeko erabiltzen zen hitza.
