Hilabete gutxi geratzen dira Korrikaren 23. edizioak Euskal Herriko txoko guztiak koloreztatzeko. Martxoaren 14an abiatuko da lekukoa Irunetik, eta 24an amaituko da ibilbidea, Baionan.
Harro Herri da hautatutako leloa, «euskal komunitateak euskararekiko sentitzen duen harrotasunaren adierazle eta erakusle».
Aitziber Balantzategi Ibargoitiak, AEK-ko Artezkaritza-kontseiluaren lehendakariak eta KORRIKA batzordeko kideak nabarmendu zuen «oztopoak gainditzeko» komunitate «sendoa» dagoela: «Aurreko edizioko parte-hartze masiboak argi utzi zuen gure hizkuntzaz harro gaudela eta guztion artean komunitate sendoa osatzen dugula. Oztopo guztiak gainditzeko gai den herri harroa, eta harro KORRIKAn».
'Azterketak Euskaraz' plataformako kideak omenduko dituzte
Aurtengo edizioko omenduak Ipar Euskal Herriko 'Azterketak Euskaraz' plataformako kideak izango dira, Frantziako Estatuko hizkuntza-legeari aurre eginda baxoa eta brebeta euskaraz egiteko eskubidea aldarrikatzen dutenak.