Askok eta askok sentituko zuten oinetan dardara eta dantzan hasteko tentazioa atzokoan, eta zenbaitek, horri eusteko ahaleginik ere ez zuten egin. Bailara dantzan jarri zuten Inauteri igandean, Iñude eta Artzainek Astigarragan, Zahagi Dantzako gaztetxoek Goizuetan, eta Ttarlaren konpartsako fruta eta barazkiek Hernanin. Kutsakorra zen haien dantzarako gogoa, eta kutsakorra haien poza.
Eta kutsakorra ez ezik, baita iraunkorra ere. Horregatik, oinek dardarka jarraituko dute gaurkoan, Inauteriek ere segida izango baitute, Goizuetan eta Hernanin.
Atzokoa zuten aurreneko eguna goizuetarrek, eta gaztetxoen Zahagi Dantzarekin eman zieten hasiera Karnabalei, ohi bezala. Gaurkoan, bestelako itxura hartuko du herriak. Mozorroak baserriz baserri dabiltzan bitartean, Kaldereroek hartuko dituzte Goizuetako kaleak eta plazak, horixe baitute aurtengo gaia, Inauteri astelehenerako. Goizeko 11:30etan hasiko dute kalejira, eta bazkari herrikoia egingo dute ondoren. Mozorroak, berriz, iluntzean bueltatuko dira herrira, dultzaineroekin batera.
Hernanin, berriz, azkenekoetan dira Inauteriak, laugarren eguna baitute dagoeneko. Baina bihar sardina ehortzi aurretik, egun ederra dute gaurkoan gozatzeko oraindik, haur eta gaztetxoek bereziki: Azeri Dantza, Kulki industriako herri kirolak haurrentzat, erraldoi eta buruhaundiak, puzgarriak...
INAUTERIETAN GAUR
GOIZUETAN
08:00, Mozorroen abiera baserrietara.
10:00, Plazaren apainketa. Gaia: Kaldereroak.
11:30, Kalejira herrian zehar.
13:30, Bazkaria.
16:30, Haur eta gaztetxoentzat entretenimendua.
18:00, Txokolatada.
18:30, Musika: Garazi eta Gorka, ikastolan.
Ilunabarrean, Mozorroen etorrera dultzaineroekin.
22:00, Mozorroen afaria.
HERNANIN
09:00, Diana, Hernaniko Herri Musika Elkartearen eskutik.
10:00, Azeri Dantza gaztetxoentzat.
11:30, Poniak eta zezen txikiak haurrentzat, Latsunbeberrin.
12:00, Kulki, industriako herri kirolak haurrentzat, Atsegindegin.
16:00, Erraldoi eta buruhaundien konpartsa, dultzaineroek lagunduta.
17:00, Haur eta gaztetxoentzako puzgarriak, Atsegindegin.
