10 eguneko konfinamendua beharrean, zazpi egunekoa egin beharko dute aurrerantzean, Covid-19an positibo ematen dutenek. Hala erabaki dute Espainiako Gobernuko Osasun Ministerioak eta autonomia erkidegoetako agintariek, «aho batez», gaur egin duten bileran. Erabaki hori Osasungintzako Lurraldearteko Kontseiluak berretsiko du, gaur arratsaldean bertan.
Horrekin batera, murriztu egingo da konfinamendu epea, positibo eman duen norbaiten kontaktu zuzen direnentzat ere, 10 egunetik zazpira. Horrek bereziki eragingo die 12 urtetik beherakoei, oraindik txertoa jaso ez badute. Izan ere, txertoaren pauta osoa jaso dutenek, dagoeneko ez zeukaten konfinamendua egin beharrik, positibo baten kontaktu zuzena izanda ere.