Gaztelekuan elkartzerik ez daukatenez, Koronabirusak eragindako egoera berrira egokitu dira Hernanin eta Astigarragan, eta etxetik etxera elkartzen dira orain, sare sozialen eta interneten bitartez. Horretarako, egunero prestatzen dute plana, bi herrietako Gaztelekuek; eta egun hauetan ere, badute zerekin entretenitua, nerabeek.
Hernanin, 18:00etan jartzen dute hitzordua arratsaldero, Jitsi Meet izeneko aplikazioaren bitartez; eta hgaztelekua idatzita sartu daitezke, Gaztelekuaren egongela birtualera, hezitzaile eta gazteekin elkartzeko. Gaur, Etxealditik Euskaraldira kanpaina aurkeztuko dute bertan.
Bihar, berriz, Hernaniri buruzko galdetegia zabalduko dute Instagramen bitartez. Beste lehiaketa bat ere martxan da, aste osoan zehar: euskal asmakizunak. Egunero ari dira asmakizun bat jartzen Instagramen, eta erantzunak bidali behar dituzte, 12-17 urteko gazteek. Igandean jakinaraziko dute zein den irabazlea, 19:45etan Instagramen egingo duten zuzenekoan. Asmakizunen liburua da saria.
Astigarragan, berriz, Zeinek asmatu gehien? jolasean ariko dira gaur, hiriburuak gai hartuta. Bihar, Gazterrezetaren txanda izango da, eta Oreo irabiatua egiten ikasiko dute. Eta igandean, dokumentala jarriko dute ikusgai: Super size me. Datorren asterako ere jarri dute plana: Hitz Pasa jolasa astelehenean, eta txiste lehiaketa asteartean eta asteazkenean.