Eusko Legebiltzarrerako hauteskundeak bertan behera utzi dituzte, eta estatuko mugak itxi

Aurreneko laneguna zen atzokoa, Espainiako Gobernuak osasun alarma deklaratu zuenetik. Eta errepideetan trafikorik bazen ere, nabari zen beherakada, herrietako kaleetan bezala. Erosketak egitera edo laneko joan-etorrietara mugatu ziren ge­hienen ateraldiak, eta hainbat komertziotan, ilara egin zuten kanpoan, pilaketak sai­hestu eta tarteak mantentzeko.

Egunez egun ari dira erabaki eta neurri berriak hartzen erakundeak, COVID-19 edo Koro­nabirusak eragindako egoeraren bilakaera ikusita. Atzokoan, Eus­ko Jaurlaritzak jakinarazi zu­en, bertan behera geratu di­re­­­la Eusko Legebiltzarrerako hau­teskundeak, apirilaren 5ean egi­­te­­koak zirenak. Hala adostu du­te alderdi politikoek (EAJ-PNV, PSE-EE, EH Bildu, Elkarrekin Podemos-IU, PP eta Equo bil­du ziren atzo), eta jakinarazi dute, data berria zehaztuko dutela egungo alarma egoera noiz bu­ka­tzen den arabera. Azaldu du­tenez, orain ez da posible hauteskundeak egitea, «osasuna eta bozkatzeko eskubidea behar be­zala bermatuz».

Espainiako Gobernuak, berriz, mugak ixteko erabakia har­tu zuen atzo. Gaur gauerditik, kontrolak berrezarri dituzte estatuko mugetan, eta bakarrik utziko diete sartzen espainiar naziotasuna dutenei, Espainian bizi direnei, edota ezinbesteko arrazoiren bat egiaztatzen dutenei.

Lokal asko itxita eta dendek ordutegi mugatua, Goizuetan

Goizuetan ere hartu dituzte neurri berriak, Koronabirusaren zabalkundeari aurre egiteko. Ho­rrela, azaldu dute, udal bule­goetan ez dela aurrez aurreko arretarik egingo, eta itxita egongo direla herriko lokal gehienak: jubilatuen elkartea, Xalto eskola, Belako tailerra, Mutu, Izkina, Oxeguarda eta Zubiondo tabernak, Umore Ona elkartea, Zubimuxu aterpetxea, kirol instalazioak, parkeak, Goxali, Irati eta Kirbil ileapaindegiak, eta eliza. Eta era berean, ordutegia mugatu du, zabalik egongo diren denda eta zerbitzuentzat: janari dendak, harategia eta estankoa 19:30ak arte egon daitezke zabalik, eta okindegia 11:30ak arte. Zabalik egongo dira, baita ere, farmazia, bankua eta gasolindegia, eta martxan garraio eta posta zerbitzuak.

Udalak eskatu du, errespetatzeko komertzioetako arauak eta langileak, eta kasu egiteko ateetako oharrei. Eta deia luzatu du, arrisku taldeak babestu eta erantzukizunez eta arduraz jokatzeko. «Elkar zaintzen badugu, xamurragoa izango da garai gogor hau».

Udal zerbitzuak telefonoz eta postaz bakarrik, Hernanin

Hernaniko Udalak, berriz, Krisi Mahaia osatu zuen atzo, osasun alarma «udal langileen antolaketan eta zerbitzuetan izaten ari den eragina kudeatzeko asmoz». Bertan hartu zuten parte alkateak eta zinegotzi batek, antolakuntza eta pertsonal bu­ruak, informatikariak, lan pre­bentzioko teknikariak, langile­en komiteko lehendakariak, eta segurtasun batzordeko langile­en ordezkari batek.

Atzoko bileran erabaki zuten, ahal bezainbeste mugatuko dituztela modu presentzialean egin beharreko lanak, «langileen zein herritarren osasuna babesteko». Horrela, erabaki zu­ten udaletxeko zerbitzuek ez du­tela aurrez aurreko arretarik es­kainiko, eta telefonoz eta posta elektronikoz bakarrik erantzun­go dutela. Udalaren webgunean daude, harremanetarako kontaktu guztiak, eta Herritarren Harrera Zerbitzuaren telefonoa honakoa da: 943 33 70 00.

Era berean, jakinarazi dute martxan mantenduko direla igogailu publikoak, baina ezinbesteko kasuetan bakarrik erabiltzea gomendatu dute: «derrigorrezkoa den kasuetan, banaka sartu, eta laguntza behar duen pertsonaren bat badoa, gehienez ere binaka», adierazi dute.

Eta garraio publikoari dagokionez, zehaztu dute Hiribusak bere zerbitzua murriztuko duela, eta udako ordutegia hartuko duela. Hortaz, 08:00etan hasiko da, eta 13:00etan abiatuko da Hiribusaren azkeneko txanda, Elkano kaletik. Guztira, bost buelta egingo ditu, 08:00etan, 09:00etan, 10:30etan, 12:00etan eta 13:00etan abiatuta, Elkanotik. Ordutegi osoa ikusgai dago, interneten: www.hernani.eus.

Bestalde, komun publikoak itxi egingo dira.

Zamalanen ordutegia, 24 ordura zabalduta

Hernaniko Udalak jakinarazi du, baita ere, Udaltzaingoak ez di­tu­ela kontrolatuko ordu eta erdi­ko TAO guneak, «jendea ka­le­ra atera ez dadin kotxea mu­gi­tzera». Eta zamalanentzat gor­detako guneen ordutegia, 24 ordu­ra zabaldu dute, oinarrizko hor­nidura bermatzeko. Kaxkoko za­malanen ordutegia, berdin mantenduko da.

Lapurretak, egoera baliatuz

Osasungintzatik ohartarazi du­te, bestalde, egoera baliatzen ari di­­rela hainbat, etxeetan lapurre­tak egiten saiatzeko. Mediku eta erizainen izenean deitzen dute etxeetara, esanez etxean neurriak hartu eta desinfektatzeko la­nak egitera dijoazela, baina lapurreta egiteko aprobetxatzen dute hori.

ATZOKO DATUAK

GIPUZKOAN*

26
positibo berri

89
positibo guztira

5
hildako

28
ospitalizatuta

NAFARROAN**

274
positibo guztira

2
hildako

62
ospitalizatuta

*Atzo 14:00etan
**Atzo 12:30etan