Txikitatik izan du gustuko Iturbek Rally mundua, anaiarekin eta bere lagunekin tarteka igoeraren bat ikustera joaten zen. Hala ere, argi utzi du, Xemark Iriondo bere bikote bihurtu zenetik, murgildu zela benetan motorraren mundu honetara. Eta talde aparta osatzen dute; Iriondo bolantean eta Iturbe ondoan, datozen jarraibideak «kantatzen».
Etxekoen eta ingurukoen gertutasuna
Iturbek adierazi du, beti izan duela inguruko laguntza, «lagunak beti joaten dira karreretara animatzera». Etxean ere animoak jasotzen dituela azpimarratu du, anaiarenak espreski.
Aurreko urtean izan zen Iturberen debuta, eta guztira 8 bat lasterketetan hartu du parte. Iriondok berriz, badaramatza 7 bat urte Rallyen espazio honetan. Aurtengo tenporadan geldirik daude. Iturbe, Ingenieritza Mekanikoa ari da ikasten eta adierazi du ordu asko igaro behar dituela paper eta apunte artean, denbora mordoa kentzen diola azpimarratuz. «Enuen aukerarik entrenatzeko, ezta lasterketetara joateko. Xemark bera ere ikusteko astia juxtu-juxtu ateratzen nuen».
Iturberen debuta
Goierrin izan zen burutu zuen lehen lasterketa, Ordizian. Eguraldi txarra tokatu zitzaien, «izugarrizko zaparradak egin zituen, eta gainera gaualdera burutu zen lasterketa». Hala ere, egoera klimatologiko kaxkarrak, ez zituen Iturberen gogoak itzali. Oraindik ere oso sentsazio positiboak dauzka bere debutaren inguruan, «nire lehen lasterketan, oso gustura aritu nintzen».
Lasterketa aurretik, zer sentitu?
Hasierako momentuak oso urduriak izan ohi dira, eta Iturbek adierazi du, hankak dardarka izaten dituela. Hasierako momentua gehiago gustatzen zaiola ere aipatu du, adrenalina gehiagoko uneak direlako nonbait. «Tramoan kronometroak zero markatzen duenean, bazoaz, eta gainontzekoak bost axola, zu zurera zoaz».
«Entrenamenduak»
Rallyko lasterketa antolatzen dutenak, tramoan bertan jartzen dira astebete lehenago, jendeak entrenatzeko eta ibilbideari buruzko datuak hartzeko. Hala ere, fitxa bat bete behar da, parte hartzaileek egindako tramo kopurua kontrolatzeko egiten dute gehienbat. Gehienez, lau pasada egin daitezkeela adierazi du Iturbek,« tramotik igarotzen zaren bakoitzean, fitxatu egiten zaituzte». Lau tramo baino gehiago eginez, zigorrak daude. Hala ere, entrenamendu libreak egitea uzten duten Rally lasterketak ere badadue. Iturbek azpimarratu du, normalean kontrolatuta izaten direla gehienak, eta gehienez 4 saio egin daitezkela.
Garaiak asko aldatu direla dio Iturbek, «lasterketa bakoitzean hamar bat neska elkartzen gara».
Esfortzuak
Rallyetako munduak, hainbat eta hainbat esfortzu dakartza, eta haietako bat ekonomikoa da. Auto batek jarraipen bat behar du, eta lasteketetarako bada, are gehiago. Orduak eta orduak pasa dituzte Iturbek eta Iriondok, autoa konpontzen eta xehetasun guztiak jartzen. Iturbek adierazi du, berez, auto baten mantenimendua ez dela hain zaila; olioa aldatzea eta ezer gutxiago. Bikotekidearen kasuan, Iriondo «kapritxosoa» dela aipatu du Iturbek, eta horrek noski gastu gehiago dakartzala. Hala ere, Iturbe bere «saltxan» gustura.
Autoak dakartzan gastuez gain, lasterketetan apuntatzeagatik ordaindu egin behar da, 120-150 euro inguru, kilometro kopuruaren araberako prezioa dute. Hori dela eta, Iturbe eta Iriondok zortzi bat karrera egin zituzten, aurreko urtean, «poltxikoak ez digu gehiagorako uzten».
Emakumeak Rallyetan
Iturbek dio, denborak eta garaiak asko aldatu direla. Gaur egun, bere inguruan, Rallyetan kopiloto gisa aritzen diren neska asko daudela, «lasterketa bakoitzean hamar bat neska elkartzen gera», eta noski horrek poztu egiten du Iturbe.
Kopiloto izatetik, piloto izatera
Argi utzi du Iturbek, jende askok galdetu diola, kopiloto izatetik piloto izatera pasa nahi al duen, eta berak honakoa dio, «ez dut aukera hori deskartatzen». Iriondoren autoarekin ibiltzen dira lasterketetan, eta horrek ere atzera botatzen du kopilotua, ez baita bere autoa.
Datorren urtean, jardunaldi osoa egiteko asmoa daukate, bikote moduan. Inguruko lasterketetan parte hartzeko asmoz eta gogoz daude. Beraz, hurrengo denboraldirako motorrak berotuz doaz pixkanaka.