Ia neguan bezainbeste lan izaten dute udaran ere, Udal Liburutegian. Hori bai; gehienak, opor egunetarako liburu aproposen inguruan galdezka etortzen dira. «Jende asko dator oporretara dijoalako gomendio eske, oporretan irakurtzeko liburu arin eta entretenigarrien bila», dio Ainara Aiestaran Iruretagoienak, udan lanean ari diren bost langileetako batek.
Edonorentzako moduko gomendioak dauzkate, hala ere, eta eskaintza berezia interes guneetan, liburuak opari azokan...
Denen neurrira
Neguko martxarekin alderatuta, «antzeko martxa» nabari dute Udal Liburutegian. «Ekitaldi askoz gutxiago antolatzen dugu, baina maileguan, kontsultatzera etortzen den jende kopuruan... antzeko martxan jarraitzen dugu».
Kontsulta egiteko moduan dago, bereziki, aldaketa. «Normalean baino gehiago galdetzen digute liburu bat gomendatzeko, eta gehienak dira oporretara eramateko liburuak, arinak, entretenigarriak. Istorio tristerik ez. Normalean berdin zaie generoa». Horrelakoetarako «oinarrizko liburu batzuk» izaten dituzte zerrendan. «Lanean ari garenok oso desberdinak gara, eta oso gauza desberdinak irakurtzen ditugu. Baina badaude liburu batzuk gehienoi gustatu zaizkigunak». Horiekin, eta liburutegira etortzen direnek gomendatzen dituztenekin osatzen dute zerrenda hori. «Ahoz ahokoak asko funtzionatzen du». liburutegia.hernani.eus webgunean ere partekatzen dituzte. Orain arte Freskagarriak, udako gida ere atera izan dute. «Baina aurten ezin izan da. Hala ere, urte hasierako Kutunenak gidak funtzionatzen du. Hasi ginen 40 libururekin, eta aurten, dagoeneko, 56 atera dira».
Bestelakorik eskatzen duenik ere bada, ordea. «Badator jendea, baita ere, asko irakurtzen duena. Horiek guretzat zailagoak dira, gomendatzen ditugunak irakurrita dauzkatelako! Baina saiatzen gara. Hilero jasotzen ditugu liburu berriak, eta nobedadeak prestatzean hartzen diegu tankera, zein publiko motari gustatuko zaion. Hala ere, sakonago irakurtzen duten horiek ez digute normalean galdetzen».
«Nahiago genuke [liburu] gehiago eramango balituzte!»
«Irakurri egin behar dutela esan dieten haurren gurasoak etortzen dira laguntza eske, normalean beraiek ere ez dute ohitura haundirik irakurtzeko»
Asko ala gutxi, zer ote?
Kopuruak zehazten zaila da, hala ere. «Hilean bat irakurtzea ez da asko, niretzat. Hemen ikusten dugunarekin ez. Asko da, hilean lauzpabost liburu. Dezente daude horrelakoak!».
Liburuak nolakoak diren, berriz, hobe irakurleek erabakitzea. «Literatura ona eta horrelako kontzeptuak ez zaizkit gustatzen. Liburu batzuk denbora gehiago eskatzen dute, baina... Liburuzainen artean bada hor, desadostasunik!».
Eta ez dira helduak, asko irakurtzen duten bakarrak. «Badaude eskolan edo etxean irakurtzea agindu dietenak». Horrelakoetan gurasoak etortzen zaizkie galdezka; «irakurri egin behar dutela esan dieten haurren guasoak etortzen dira laguntza eske, normalean beraiek ere ez dute ohitura haundirik irakurtzeko». Baina «badaude haurrak dezente irakurtzen dutenak», eta haiek garbi izaten omen dute zer nahi duten: «bildumak nahiago dituzte».
Interes guneak, azoka eta online aukera
Gida bila ere asko joaten omen da jendea, «Europa edo munduko beste lekuetakoen bila, gehiago». Baina udan denak ez dira kanpora joaten. Haientzat Interes Gunean, sarreran, jarri dituzte bestelako gidak. «Euskal Herria oinez izena du. Hemen gelditzen direnentzako. Bertakoa hobeto ezagutzeko, urrutira joan gabe».
Beste batzuk, kanpora joanda ere, ez dira pisu haundiak eraman zaleak. Kasu hauetan, eLiburutegia zabaltzen ari omen da. «Liburu elektronikoak irakurtzeko plataforma da. Behar den bakarra da, sareko liburutegi bateko txartela edukitzea». Eta pelikulak ere ikusi daitezke.
Hainbeste aukerarekin, ordea, espazio falta izaten dute arazo, Udal Liburutegian. «Hilero liburu berriak jasotzen ditugu, 80 bat, baina apalak berdinak dira!». Horregatik, xahututako liburuekin, «denbora askoan mailegatu ez direnekin» azoka jartzen ari dira eguraldi ona egiten duenetan, Biteri kanpoaldean. «Asko dauzkagu, eta nahiago genuke gehiago ere eramango balituzte!». Beraz, on egin!
GOMENDAGARRIAK
HELDUAK
- Los asquerosos. Santiago Lorenzo.
- Atzerrian. Nerea Balda San Juan.
- Cornelia. Florencia Etcheves.
- Cuando sale la reclusa. Fred Vargas.
- Denok gara google. Xabier Etxaniz Rojo.
- Una educación. Tara Westover.
- Esnearen kolorekoa. Nell Leyshon.
- Fakirraren ahotsa. Harkaitz Cano.
- Film zaharren kluba. Alberto Ladron Arana.
- Hariak. Joseba Peña.
- La retornada. Donatella di Pietrantonio.
- Todo el bien y todo el mal. Care Santos.
GAZTEAK
- Bajo el paraguas azul. Elena Martínez Blanco.
- Coraline. Neil Gaiman.
- Everest: herri oso bat gailurrean [komikia]. Cesar Llaguno.
- Hilezkorra. Fernando Morillo.
- Sasieskola. Garbiñe Ubeda.
- Sasiolako errotarria. Ramon Olasagasti.
*Gomendio gehiago: liburutegia.hernani.eus