Abiatu da 21. Korrika! Ostegunean hasi zuen euskeraren aldeko bere bidea, eta gaurko eguna Nafarroan barrena pasako du, Nafarroa Beherera pasa aurretik.
Urumea bailarara gaur zortzi iritsiko da. Oiartzundik barrena sartuko da Astigarragara, apirilaren 12tik 13rako gaueko 01:02ean, eta Astigarragatik Hernanira irtsiko da, Zinkoeneara, 01:24ean. Urnietara segiko du gero, 02:03an.
Aurretik, hala ere, adin guztietako herritarrek hartuko dute parte apirilaren 12an, egunean zehar egingo diren hainbat Korrikatan, eta festa giroan itxoingo dute Korrika iritsi arte; Hernanin, Kilimak taldearen kontzertuarekin, eta Astigarragan, Laiotz musika taldearen emanaldiarekin eta kantu afariarekin. Korrika pasata ere, Laiotzek joko du berriro.
Testigua, zozketan
Dobera-Kronikak, urtero bezala, bere kilometroa egingo du Hernaniko udaletxe atze inguruan, eta testigua nork eraman erabakiko da nahi duten bazkide, Kronikalari eta Latxeko harpidedunen arteko zozketarekin.
Parte hartzeko, nahikoa da albiste honi interneten iruzkin bat egitea, kronika@kronika.eus helbidera idaztea edo telefonoz deitzea 943 33 08 99ra. Astelehenean, egingo da zozketa.
Bestalde, 21. Korrika honetako petoa lortu nahi duenak, AEK euskaltegiko bulegoetan dauzka salgai, bost euroren trukean.
Jarraipena argazkiekin, Eli Gorostegik
Korrika iruditan jarraitu ahal izango da aurten ere, Kronikaren bitartez. Eli Gorostegi argazkilari hernaniarrak egingo ditu argazkiak Urumean, baina Kronikako webgunean jarriko dira ikusgai.
Erosteko, berriz, harekin jarri beharko da harremanetan: eli.gorostegi@gmail.com edo 688 858 872.
KORRIKA KULTURALA
Apirilaren 12, Hernanin
10:15, Mikrokorrika, Haurreskolatik.
11:00, Korrika Txikia, atletismo pistatik hasi eta Plazaraino. Ereñotzuko Txirrita ikastetxeko ikasleek ere hartuko dute parte.
12:30, Korrika Gaztea, Tellerigainen hasi eta Plazaraino.
16:00, Dinokorrika, Sandiusterritik aterata.
19:30, Kilimak taldearen kontzertua, Tilosetan.
Apirilaren 12, Astigarragan
11:30, Korrika Txikia, Herri Eskolatik atera eta Ergobia aldera, Kako ingurutik bueltatzeko.
19:30, Laiotz, JB plazan. Korrika pasata, berriro ariko da musika taldea.
21:00, Kantu afaria JB plazan, Ibon Otaegi eta Xabier Urdangarinekin. Txartelak atzo arte egon dira salgai.