Nekane Arzallus ergobiarrak GBC saskibaloi taldeko presidente izateari utzi berri dio. Lau urte izan dira kargu horretan, baina hamabi, taldeko zuzendaritzan sartu zenetik.
«Ez nuen limiterik jarri. Zortzi urteko epea ona dela uste dut, baina Donostiako alkateak (Eneko Goia) deitu zidan bere taldean joateko datozen udal hauteskundeetan. Sorpresa bat izan zen, baina momentuak izaten dira eta ez dira beti sortzen aukera hauek. Pauso hori emateko momentua zen, ezin diozu esan lau urte itxaroteko eta hurrengoan izango dela. Politikan gauzak horrela izaten dira. Nire buruhaustea momentu horretan saskibaloi kluba zen, kirol egoera ez delako ona, baina atzera begiratu eta jende egokia zegoela ikusten nuen; eta beraiekin hitz egin ondoren, lasai aurrera joateko esan zidaten».
Gipuzkoa Basketeko zuzendari batzordean sartu zenetik hamabi urte pasa dira eta gauzak asko aldatu direla argi du Nekane Arzallusek. «Kontseiluan sartu aurretik laguntzen ibiltzen nintzen taldean. Aurrekontuak asko aldatu dira, denborak ere bai. Urte guztiak desberdinak izan dira; gogorrak hein haundi batean, bainza pozik egindako lanarekin».
Bere presidente urteen balantzea egiterakoan, positiboa dela adierazten du astigartarrak. «Ona da. Ikusten badugu ekonomikoki, gaizki geunden; pixkanaka hobeto gaude. Kirol ikuspuntutik, lehenengo urtean LEB Liga irabazi eta ACBra igo ginen. Aurreko urtea mirari bat izan zen, ez ginen jaitsierako postuetan jardunaldi bat bera ere egon, eta hamairugarren amaitu genuen. Aurtengoa zaila izaten ari da kirol arloan, baina egonkortasunaren bila gabiltza».
«Erronka sentimendua sortzea da, Gipuzkoako saskibaloian»
Saskibaloiaren erronka nagusia Gipuzkoan «sentimendua» sortzea dela dio Arzalluzek. «Taldearekiko atxikimendu hori lortu behar da. Badago zaletasuna saskibaloiarekiko, eta beharra ere bai. Ezin da dena futbola izan, eta horretarako beste erreferenteak behar dira. Egia da sentimentu horren bila gabiltzala. Kluba sentitzen duen jendea behar da eta horretarako lan haundia egin behar da, Gipuzkoa osoko beste talde guztiekin. Horretan gabiltza, jakinda ez dela erraza», azaldu du astigartarrak.
«Minus bat jarri behar banie lau urte hauei, Ilunbera jende gehiago ez erakartzea izango litzateke»
Badaki erronka oso zaila dela, baina urte hauetan zerbaitetaz konturatu bada Nekane Arzallus, da jendeari irabaztea gustatzen zaiola. «Saskibaloia gustatzen zaigu, bai, baina batez ere irabaztea. Adibidez LEB irabazi genuenean, 2.000 pertsonak betetzen zuten Gaska, eta gustora, irabazten zelako. Pasa den urtean, irabazten hasi ginenean zaleak etortzen hasi ziren. Aurten, berriz, ez. Nola lortu zaleak erakartzea eta ilusioa piztea da, GBCk duen erronkarik haundiena».
Hala ere, GBCri gertatzen zaiona, talde gehiagotan eta orokorrean kirolean gertatzen ari den joera bat dela nabaritu du Nekane Arzallusek. «Futbolean bertan ere ikusten dugu, Realak arazoak dituela azken urteotan, zaleen erantzunarekin, Anoetan. Beste taldeekin asko hitz egiten dugu; bai Bera Berarekin, bai IDKrekin, Donostiako taldeekin batez ere, baina baita Gurutz Aginagalde Bidasoako presidente berriarekin; eta denok arazo hori daukagu. Egia da Gipuzkoan goi mailako talde asko daudela, eta denen bazkide izatea zaila da».
«Egonkortasunaren bila dabil GBC eta baita taldearekiko zaletuaren atxikimendu bila»
Telebistaren eragina ere azpimarratzen du. «Alde batetik ongi datorkigu, dirua ekartzen duelako, baina bestetik, zaleak kentzen dizkigu. Telebistarekin eta internetarekin edozer ikusteko aukera duzu. Modak ere sortzen dira».
Gipuzkoako saskibaloiak bere olatu haundia izan zuen GBC igo zen urteetan, 2005, 2006, 2007 eta 2008 urteetan. «Alde batetik, Reala ez zebilen ongi eta jaitsi egin zen; eta bestetik, Gipuzkoan urte askotan ez zen saskibalo talderik goi mailan egon, eta ilusio haundia piztu zen igoerarekin. 7.000 bazkide eduki genituen eta Ilunbe betetzen genuen. Egia da gero emaitza txarrak etorri zirela, eta ekonomikoki arazoak eduki genituen. Aurrekontuak gutxitzen joan ziren. Modu batean esanda zalea ez genuen ongi zaindu eta hori berreskuratzea oso zaila da. Familientzako abonoak atera genituen, eta oraindik mantentzen ditugu».
«Helburua ACBn mantentzea da, baina bururik galdu gabe; jaitsierak naturaltasunez hartu behar dira»
Aurtengo urtea zaila izan arren, maila galtzea ez du drama bezala ikusten Nekane Arzallusek. «Naturaltasunez hartu behar da, daukagun aurrekontua mantentzen badugu. Igogailu taldea izango gara. Helburua ACBn mantentzea da, hori lortu behar dugu, diru aldetik ere hobea da, diru gehiago jasotzen duzulako; baina ezin da burua galdu. Ikusi behar da nondik gatozen, non egon garen eta buruarekin, pixkana-pixkana, egonkortasuna lortu behar da. Ezin da fitxatzeagatik fitxatzen hasi, eta dirua eskatzen. LEBen gaudela? Ba orain bi urte oso gustora egon ginen. Sendotzea da helburu nagusia. Pasa den urtean Betis eta Bilbao Basket jaitsi ziren, bi talde indartsu, eta Sevillan oso gustora daude aurtengo denboraldiarekin. Ilusioa sortzeko balio izaten du askotan».
Saskibaloian, eskubaloian gertatu dena ez gertatzea espero du GBCko presidente izan denak; hau da, talde profesional bakarra eta beste guztiak erdi profesional izatea. Baina arriskua hor dagoela dio. «ACB Ligaren barruan kezka hori badago, eta zerbait desberdina egin behar dela argi dago. Aztertu beharreko beste gaia, taldeen arteko aurrekontuen arteko aldeak dira. Guk 2 milioi euroko aurrekontua dugu, eta 32 milioi euroko aurrekontua duenik bada, Real Madril bezala. Mugak jartzea ere planteatu izan da».
Formula egokia bilatzea ez dela erraza dio ergobiarrak. «Txapelketaren sistema aldatzea pentsatu da, baina asmatzea oso zaila da. Hor ibiltzen gara ika-mikan, baina denek argi dugu aldatu egin behar dela», azaldu du.
«Emakume presidenterik gabe geratuko da ACB Liga; epaile bat dago, eta bigarren entrenatzaile bakarra»
Nekane Arzallus da emakume bakarra bilera horietan. «Orain emakumerik gabe geratuko da ACB Liga, eta pena bat da. Ni nintzen emakume lehendakari bakarra, Fuenlabradan neska bat dago bigarren entrenatzaile bezala, eta gero epaile bakarra dago. Hori ikusi eta galdetzen duzu, oraindik horrela gabiltza? Hala ere, aurrerapausoak eman dira, eta ea mantentzen diren. Erreferenteak hor daude. Kuotak behar direla ikusten da».
Gainera, kontuan hartu behar da emakumeek gehien jokatzen duten kirola dela saskibaloia. «Ez hori bakarrik. Gipuzkoako goi mailako lehendakari denak emakumeak gara; IDKn, Iraurgin, Hondarribin?», nabarmendu du.
«Erabilera anitzeko pabilioia behar da Gipuzkoan, baina ez berria; hor dago Ilunbe eraberritzearen aukera»
Nahiz eta presidentetza utzi, GBCtik hurbil jarraituko du, urte asko baitira, bertan eman dituenak. «Taldera eta saskibaloira oso lotuta nago. Eta noski, barruan dagoen jendearekin lotuta nago, bulegoan dagoen jendearekin». Orain, politikaren ikuspuntutik beste gai bati heldu beharko dio seguru asko, eta hori Donostiako erabilera anitzeko pabilioiarena da. PSE-EEk berria eraikitzearen aldeko apustua egin du, baina EAJk zuzentzen duen Udala Ilunbe eraberritzearen aldekoa da. «Donostiak eta Gipuzkoak erabilera anitzeko pabilioia behar du, baina leku hori Ilunbe da. Eraberritu edo birmoldatu egin behar da, ezin da hiltzen utzi orain dela horrenbeste urte eraiki zen zezen plaza eta eraikina».
Gasteizen egin zena jartzen du adibide bezala. «Ganadu ferientzako erabiltzen zen, hasieran berritu zen eta gero bigarrenez birmoldatu da. Lekua badaukagu eta gauza asko egiteko egokitu behar da. Oso ongi geratuko da. Zezen plaza izateari utziko lioke seguru asko. Kontuan hartu behar da, baita ere, Anoetako instalakuntza guztiek behar dutela birmoldaketa. Belodromoan egin da berritze bat, baina gehiago ere badaude, eta berria egiten bada, ez da egongo dirurik Paco Yoldirentzako, esaterako».
Kirol profesionala, gustuko
Kirol profesionala oso gustuko izan du beti Nekane Arzallusek. «Ergobiko eskolan ikasi nuen zazpi urtera arte, eta gero Martutenera joaten ginen, Arantzazuko Amara. Kirola pasioa zen niretzat, eta hala da oraindik. Futbolean jokatzen nuen. Garai haietan mutilak futbolean aritzen ziren, eta neskak sokasaltoan edo briletean. Ni Reala ikustera joaten nintzen, eta futbolean jokatzean, entrenatzaileak esaten zidan ez zela posible».
Nekane Arzallus Iturriza
- Ergobian jaio zen 1965ean.
- Donostia Gipuzkoa Basket ACB taldeko presidente izatera heldu zen 2015an eta Espainiako Liga nagusian egon zen bigarren emakumezko presidentea izan zen eta lehendabizikoa urte bete baino gehiago karguan.
-2009an Gipuzkoako Golf Federazioko presidente izendatu zuten, Basozabal klubeko presidente ordea izan zen.
-4 urtetan Metadeporte aldizkariak Espainiako eragin handienetakoa duen emakumea izendatu zuen kirol arloan.
Aspegik zuzendari onena izendatu du
«Izugarrizko ilusioa egin zidan saria jasotzeak. Erreferenteak behar dira, ezin zara izan ikusten ez duzuna»
Gipuzkoako Golf federazioko presidente ohia
«Pena da Gipuzkoan golf zelai publikorik ez egotea, Bizkaian eta Araban dauden bezala»
Nekane Arzallusek lesio larria izan zuen belaunean eta golfean jokatzen hasi zen. «Umeekin lanean aritu nintzen, eta oso esperientzia polita izan zen». Gipuzkoako Federazioan ere, lehendakari izan zen gero.
Golfa da, publikoki gutxi ezagutzen den Nekane Arzallusen beste pasioa. Gipuzkoako Federazioaren lehendakari ere izan da. «Kirola beti gustatu izan zait. Belauna apurtu nuen eta geratu zitzaidan gauza gutxirako. Golfean sartzeko aukera izan nuen eta probatu egin nuen. Kirolean jarraitzeko irteera bat izan zen. Konpetitzea asko gustatzen zait eta golfak aukera hori ematen dizu. Ez dago adinik bertan aritzeko, eta buru belarri sartu nintzen harrapatuta geratu arte».
Umeekin lan egiteko aukera eduki zuen. «Oso polita izan zen, norbait behar zuten. Gozada bat izan zen, aberasgarria eta polita. Gero Gipuzkoako Federakuntzan sartzea eskaini zidaten. Saskibaloiko eta golfeko ardurak uztartzen nituen. Hori bai, zortzi urte nahikoak zirela garbi nuen, eta behin bete eta gero presidentetza utzi nuen. Gero, gainera, GBCko presidente izendatu ninduten, eta horrek dedikazio haundia eskatzen zuen».
Golfaren inguruan aurreiritzi asko daudela uste du Arzallusek. «Esteriotipo horiek puskatzen ari dira. Garai batean hemen klubak oso pribatuak ziren eta sartzea oso zaila zen; diru asko kostatzen zen bazkide egitea, baina orain aldatzen ari da. Pena da Gipuzkoan zelai munizipal edo publikorik ez izatea, Bizkaian eta Araban bezala. Gero eta jende gehiago ari da golfean sartzen eta oso kirol polita da». Andoaingoa da irisgarriena, bazkide egiteko.
«Golfaren inguruko estereotipoak puskatzen ari dira eskiarekin gertatu zen bezala»
Lehendabiziko pausoa ematea oraindik ere garestia dela dio Arzallusek, baina «gero ez da hain garestia eta, eskiak bere garaian egin zuen ibilbidea bezala, orain gizartearen zati haundi bati iristen zaio».
Kirolari izandako asko eta asko dabil golfean jokatzen. «Konpetitzen jarraitzeko aukera ematen du, eta asko harrapatuta geratzen dira golfaren sareetan. Eta nik izan dudan esperientzien artean, umeekin lan egitea izan da politena. Kapitain eta delegatu bezala ibiltzen nintzen, eta orain asko Estatu Batuetan daude ikasketak egiten, bekarekin. Hori oso pozgarria da niretzat. Gainera, gizonezkoek eta emakumezkoek txikitatik elkarrekin eta elkarren aurka jokatzen dute. Hori kirol askotan ez da posible; laguntasun eta gertutasun asko eskaintzen ditu».
Basozabalen, bederatzi zulo jokatzen ditu. «Denbora behar da. Goizetan jubilatuek jokatzen dute, eguerdian enpresa gizonek eta ofizio liberaletakoek, eta hiruetatik aurrera funtzionarioak dira bertaratzen direnak», kontatu du.