Abenduaren 17an ekin zenioten sinadura bilketari eta bi hilabetetan helburua bikoiztea lortu duzue.
Bai. Abenduaren 17an Lekunberrin egin genuen elkartearen aurkezpena, eta egun horretan bertan hasi ginen sinadurak biltzen. Guztira, 1.423 herritarren babesa lortu dugu Mendialdean, eta herri askotan behar genuen gutxieneko kopurua bikoiztu egin da. 16 urtetik gorako biztanleen %10aren sinadurak behar genituen Leitzan eta Lekunberrin, eta %15 gainontzeko udalerrietan. Herriz herri egindako kanpainaren ondoren, Goizuetan 240 sinadura lortu ditugu (zentsoaren %37,6) eta Aranon 44 sinadura (zentsoaren %45,8).
Pozteko moduko emaitzak...
Bai, zenbait herritan ez zaigu erraza egin jendearengana iristea, askok ez zutelako ekimena gehiegi ezagutzen; baina egindako lanaren ondoren, lortu dugu orain arte ekimenarekin harremanik izan ez duen jendea, edo gehiegi hurbildu ez den jendea, mugiaraztea eta elkartzea. Hori pozgarria da noski! Hala ere, sinaduren bitartez babesa eman duten horiek guztiak eta askoz gehiago, ekainaren 18an herri galdeketaren mahaira hurbiltzea lortu beharra daukagu, eta lan haundia dugu oraindik egiteke.
Eta hurrengo pausua zein izanen da?
Egun horretan erantzun beharreko galdera zehazten gabiltza orain. Zortzi udalerri elkartu garen arren, eta elkarrekin lanean gabiltzan arren, herriz herriko taldetxoekin ari gara dena antolatzen. Ekimen honen oinarrian herritarrak egon behar dutela uste dugu, beraiek dira prozesu guzti honen protagonistak, eta ondorioz, beraiek dira, baita ere, prozesu honetan emango ditugun pauso bakoitzaren partaideak. Horregatik, herriz herriko ekimeneko kideen laguntzaz, zenbait herritarrekin elkartzen ari gara, galdera hori zehazteko aukera ezberdinak aztertzen. Gero, udalerri bakoitzean ateratako aukeren artean hartuko da azken erabakia. Asmoa da, apirilean prozesu hau ixtea.
Galdera modu batera edo bestera egin, herritarrei euren herriaren etorkizuna erabakitzeko aukera emanen zaie, ezta?
Bai, eta norberak askatasun osoz emanen du bere erantzuna. Gainera, bere boza sekretupekoa izanen da. Protokolo zorrotza jarraituko dugu bozketa behar bezala bideratzeko. Orain arte, herritarrok ez dugu gure herriaren etorkizunaz demokratikoki erabakitzeko aukerarik izan, eta gainera, horretarako eskubiderik ez dugula sinestarazi nahi izan digute. Nafarrok, lehenengo aldiz, bai, historian lehenengo aldiz, izanen dugu gure estatusari buruz erabakitzeko aukera, eta hiru eskualde haundi (Sakana eta Bortziriak dira besteak) izanen gara aitzindari, egun berean eginez. Horrek duen balioaz ohartu behar gara. Garrantzitsuena da, norberak bere hausnarketa egitea, hemendik ekainera bitarte.
Goizuetan, zenbat lagun zabiltzate lanean? Zer moduz ari zarete moldatzen?
Lantaldean bost lagun aritzen gara, talde motor bezala, eta horietatik hiru Mendialdeako bileretara joaten dira. Dena den, herritar sare zabala osatua daukagu, lan eta ardura desberdinetako laguntza ematen diguten herritarrekin. Horrela jostun hauetako bakoitzak bere esparrutik eta ahal duen neurrian laguntzen du.
Orain arte nahiko ongi moldatu gara, baina datozen asteotan laguntza gehiago beharko dugu, ekainaren 18a berehala ailegatuko baita.
Eta Aranon?
Aranon egun eta ekintza puntualetarako elkartu izan gara orain arte. Martxoaren 18an, adibidez, egun osoko egitaraua prestatu genuen, eta herritar askok parte zuen bertan. Herriko gazte eta helduxeagoen arteko futbol partidua jokatu genuen, pilota partiduak ere izan genituen, herriko gaztetxoek abestu zuten, giza katea ere egin genuen, eta Gure Esku Dagoko Lierni Olmedo eta Larraitz Zubeldiak Herri Galdeketen inguruko gure zalantzak argitu zituzten. Herri afari ederra ere egin genuen, eta afalondorena, herriko argazkilarien argazkien enkante batekin alaitu genuen, Ainhoa eta Maider Ansaren doinuekin goxatuta. Halako egunak herritarrak ekainaren 18rako girotu eta animatzeko ongi etortzen dira.
Zein ekimen aurreikusten dituzue datorren asteetarako?
Aurreko asteetan, Angel Oiarbideren hitzaldi interesgarri askoa izan genuen, eta ekainaren 18ko galdera adosteko irizpideak ere markatu genituen batzar ireki batean, eztabaida mamitsu batekin. Hemendik aurrera, Mendialdea osoan egingo dugun galdera adosteko batzarra izanen dugu maiatzaren 5ean, abestiaren eta honen bideokliparen grabaketa ere berehala hasiko da... Aranon, datorren asteartean, apirilaren 25ean, eginen dugu galdera adosteko batzar irekia; iluntzeko 21:00etan, udaletxeko ganbaran bilduko gara.
Beraz, goizuetar nahiz aranoar guztiak gonbidatu nahi genituzke datozen ekimenetara. Ekainaren 18a mundiala izanen da!