Abuztuaren bukaeran eman zuten notizia: Kirol Arbitrajerako Epaimahaiak hala erabakita, Rio de Janeiroko jokoetatik kanpo geratu zen Errusiako Batzorde Paraolinpikoa. Ondorioz, errusiarren eskuetan zeuden plazak libre geratu, eta Jokoen ateetan geratutako kirolarien artean banatu zituzten.
Horietako bat izan zen Donostian bizi den Iñigo Llopis igerilari hernaniarra. Joko Paraolinpikoetara joateko gutxienekotik bi segundora geratu zen Europako Paraolinpikoetan, baina sorpresaz, Rion izango da igandetik aurrera.
Azken momentuan, sorpresaz, Rioko Joko Paraolinpikoetan izango zara. Nola hartu zenuen berria?
Izugarrizko sorpresa izan zen, bai. Hasieran ezin nuen sinestu, ekipazioa etxera iritsi zenean hasi nintzen barneratzen.
Notiziak oporretan harrapatuko zintuen, ezta? Jokoak prestatzeko aukerarik izan al duzu?
Bai, Madrilen nengoen oporretan. Pare bat aste egon nintzen deskantsatzen igeri egin gabe, baina joko paraolinpikoetara joateko aukera nuela jakin bezain pronto Donostiara bueltatu nintzen entrenatzen hasteko. Egia esan ezin izan dut oso ondo prestatu, bakarrik hilabete bat egon naiz entrenatzen eta astebete besterik ez zait geratzen.
«Gustukoen dudan proba 200 estiloak dira; kristona litzateke proba honetan finalerako pasea lortzea»
Dena den, Joko Paraolinpikoetan egotea urte askoko lanaren emaitza izango da, ezta? Aurtengo zure helburuetako bat al zen Rion egotea?
Bai, noski. Denboraldi hasieran 400 metro askeetan gutxienekora [Joko Olinpikoetan jokatzeko behar dena] hurbiltzeko aukera nuela esan zidaten, orduan, proba hori prestatzen aritu gara nire entrenatzailea, Isaac, eta ni urte osoan zehar.
Azkenean bi segundura geratu nintzen eta niretzat bajoi bat izan zen, baina errusiarren kaleraketaren ondorioz, urte osoan egindako esfortzuak izugarrizko saria izan du.
Hiru probatan hartuko duzu parte, zein dira? Zein probatan sentitzen zara gusturago?
Joko Paraolinpikoetako probak 50 libre, 100 libre eta 200 estiloak dira, eta gustukoen dudana 200 estiloak dira, uste dut emaitza hobeak lortu ditzakedala proba horretan.
Espainiako eta Europako hainbat txapelketatan izan zara urte osoan zehar. Beraz, zure aurkari batzuk ezagutuko dituzu, ezta?
Bai, maila nazionalean lagun asko ditut, maila internazionalean, aldiz, ez dut jende asko ezagutu oraindik.
«Ametsa, hor [Joko Paraolinpikoetan] egotea da, dudarik gabe»
Jokoetan zer pasako den pentsatzeko denbora izan al duzu? Ametsik?
Ametsa, hor egotea da, dudarik gabe. Baina txapelketari buruz pentsatzen dut ezin izan dudala ondo prestatu, beraz, ez dakit ze formatan egongo naizen orduan. Kristona litzateke 200 estiloen proban finalerako pasea lortzea.
Orain zoaz Joko Paraolinpikoetara, baina urte asko daramakizkizu igeriketan. Nolatan hasi zinen?
Orain dela zazpi urte hasi nintzen igeriketan orain nire taldekidea den Ikerri esker. Hasieran Dordoka taldean hasi nintzen, baina urtebete bertan igaro ondoren, Javi Aymerichek deitu zidan Konporta Kirol elkartera joateko.
Goi-mailako kirola eta ikasketak uztartzea eramangarria al da?
Niri zaila egiten zait biak eramatea, baina nire ustez bakoitzak modu batera edo bestera eramaten du.