Kirol mundua gertutik ezagutzen du Gari Etxebestek. «Lehen kirola egiten zuena arraroa zen ia; eta orain... Egin behar da, baina buruarekin, erotu gabe eta osasunarekin». Eta osasunari begiratzen diote, Poliklinikan martxan jarri den Txirrindulariaren Biomekanika Unitatean.
Nolatan hasi zarete txirrindulariarentzako biomekanika azterketekin?
Poliklinikan lanean ari naiz 2006az geroztik. Lehenago kirol munduan saiatu nintzen; Bera Bera eskubaloi taldean ere aritu nintzen lanean, baina zaila da mundu hori! Eta lehengo urtean, Oinaren Unitatea ireki zuen Poliklinikan, Podoactiva enpresak; ikerketan aritzen dira, igeniariekin ikerketa biomekanikoak egiten, txirrindarako. Ni ere kirol munduan sartua nago, triatloiak egiten ere urte asko pasa ditut... Eskaini egin zidaten, eta ni, kontentu!
Zer eskaintzen duzue?
Orain arte, txirrinda dendetan edo IBEFekoek egiten zituzten ikerketa biomekanikoak, baina guk beste ikuspuntu bat eman diogu; osasuna begiratzen dugu, txirrindularia ondo joatea, eta ez hainbeste, errendimendua.
Profesionalei begira egiten dira azterketak?
Mundu guztiari irekita gaude, mundu guztiari balio dio. Profesionalek errendimendua bilatzen dute gehiago, baina osasun aldetik hobeto badaude, min gutxiago izango dute, eta errendimendua hobetuko dute. Baina gure asmoa da zerbitzua ematea eskoletako neska-mutiletatik hasi eta 3garren adinekoak arte. Jende guztia eta diziplina guztiak landu nahi ditugu: karreterakoa, mountain bike, ziklokross...
Nola egiten duzu azterketa biomekaniko bat?
Aurrena galdetegi bat betetzeko eskatzen dugu, jakiteko zein txirrindulari mota den: gaztea ala heldua; zenbat ibiltzen den; zein lesio dituen... Eta elkarrizketan zehazten dugu dena, gero. Segidan, balorazio fisioterapeutikoa egiten dugu: postura ikusi, bizkarrak zein mugikortasun maila duen, elastikotasuna, mugikortasun artikularrak, minak... Horrek ematen digu balio erantsia; osasungintzako langileak baikara.
Gero, 3 sistema erabiltzen dira ikerketa egiteko. Batetik, estudio antropomorfikoa egiten dugu, ezagutzeko hanken luzeera, hanka tartea... Eta era berean, Real Fit Bike bizikleta robotikoa daukagu, ordenagailuko software batera lotua. Berak esaten dizu ze neurri behar dituen zure bizikletak; txirrindularia gainean jarri eta posizioa egokia ote den ikusten da. Parametroak ondo baditu, hori da bere posizioa.
Bestalde, plantillak erabiltzen ditugu zapatiletan, aulkian eta besoetan; azken hau, triatloietan ibiltzen direnen kasuan. Horrela, zenbat presio egiten duten ikusten dugu, eta azterketa fisioterapeutikoan ikusitako deskonpentsatzioak ulertzen ditugu. Horrela, jakin dezakegu zuzendu daitezkeen bizioak ote diren, ala gorputz estruktura arazoa den.
Azkenik, 4Dan grabatzeko 6 kamara dauzkagu; horrek, txirrindulariaren avatar moduko bat egiten du, angulazioa ikusteko, belaunetan, txorkatiletan, aldaketan, sorbaldetan... Eta pedaleoaren analisia ere egiten da, ikusteko efizientzia, bi hanken indarra...
Eta ondoren, bizikleta egokitu ala gure posturak aldatu behar ditugu?
Behin neurriak hartuta, aukera ematen dizu hobekien egokitzen zaizun txirrinda aukeratzeko, zuk nahi duzunaren taila jakiteko eta neurriak zuri egokitzeko. Bizikleta egokitu eta lesioak prebenitu daitezke. Ez duzu minarekin ibili behar, lesio bihurtu baitaitezke. Hori sahiestu nahi dugu. Noski, ariketak ere bildatzen ditugu, pertsona bakoitzaren beharren arabera, eta 4-6 astetara dena berrikusten dugu, txirrindulariaren sentsazioak ezagutzeko.
Horrela, aise igoko da Santiomendiko aldapa!
Aldapa gogorra da, baina gogortasuna baino inportanteagoa da bizikleta gainean pasatzen den denbora. Gogortasunak egingo dizu zure akatsak lehenago ikusarazi, baina denborak esaten du egia.
Hala ere, gogortasunean hobeto moldatzea helburu duenik izango da...
Txirrindulariek nahi dute errendimendua hobetu; teknika, pedaleoa... Asko tiratzen die. Guk osasuna bilatu nahi dugu, eta beraiek nahi dute, azkar joan!