Uda aurrera dijoa, eta datorren denboraldirako prestaketa lanak hastear dira. Noiz hasiko dituzte bi talde nagusiek entrenamenduak eta aurredenboraldia?
Gizonezkoena abuztuak 3an, bihar bertan, hasiko da, Astigarragan. Emakumeena ordea abuztuak 17an, eta ikusiko dugu non.
«Zubipe irailerako egongo dela esan digu Udalak. Momentuz belar zaharra kendu dugu auzolanean, eta udalaren eginkizuna da obra martxan jartzea»
Zein dira mutilen taldearen helburuak, denboraldi berrirako?
Txoratu gabe eta pausoz pauso, denboraldia ondo prestatu eta lehiakor izatea lehenengo partidatik. Hortik aurrera, iaz martxan jarri genuen talde gazteari jarraipena eman nahi diogu, eta erakutsi beharko dugun heldutasun handiago baten eskutik, gure buruari mugarik ez jartzea.
Neskek urteak daramazkite Emakumezkoen Euskal ligan. Zein dira aurtengo erronka nagusiak?
Euskal Liga mantendu nahiko genuke, noski! Baina horren aurretik, guretzat garrantzitsua da momentu honetan nesken departamentu guztia sendotzea, taldeari ahal dugun seriotasun guztia ematea eta lehiakortasunaren kulturan hazten jarraitzea.
Azken uholdeak medio, ateak itxita agurtu zuen Zubipek denboraldia. Berritze lanak amaitzear diren honetan, zein da zelaiaren egoera?
Amaitzear? Hasten direnean hasiko nahiz sinisten… Urumea otsailean atera zen eta, gaur arte behintzat, Zubipen egin den lan bakarra gure auzo-lana izan da. Makinarik ez dugu oraindik ikusi.
«Ni Hernanira laguntzera etorri
naiz. Kirol proiektua zortzi lantaldetan oinarritu nahi dut, dena denon egitasmoa izan dadin, baina modu ordenatu batean»
Zein dira egin diren lanak? Eta etorkizunera begira, egoera hau saihesteko beste modurik aurreikusten al da klubean?
Udaletxeak eskatuta, guk kendu genuen belar zaharra. Hortik aurrera, udaletxearen eginkizuna zen obra martxan jartzea. Baina dirurik jarri gabe egin nahi dutela argi esan digute, seguruek ematen dutenarekin bakarrik alegia! Ikusiko dugu noizko bukatzen den eta nola geratzen den…
CD Hernaniren zuzendaritza eta lantalde berria, aipatzeko aldaketak dira. Zein dira erronka nagusiak?
Ilusio handiarekin ekin diogu aldaketari. Klubak indar berria behar zuen. Egitura aldetik ideia nagusia hiru lantalde espezifikoetan lan egitea da: Komisio Instituzionala, Komisio Ekonomikoa eta Kirol Komisioa. Bakoitzean hiru direktibo eta zuzendari bat gaude eta hortik aterako dira atal bakoitzeko helburu eta bide zehatzak. Irailean egitasmo guztia aurkezteko ideia egon badago, baina zelaia daukagunean hartu ahal izango dugu benetako martxa.
Kirol proiektu berria izango al du CD Hernanik? Labur-labur, zertzelada batzuk aurreratzerik bai?
Ni Hernanira laguntzera etorri naiz. Bertakoak pixka bat probokatzera eta suspertzera. Ez dut uste nirea ezartzea ideia ona izango zenik. Bide horretatik, zortzi lantaldetan oinarritu nahi dut dena denon egitasmoa izan dadin, baina modu ordenatu batean. Alde batetik zazpi departamentutan banatuko dugu egitura: gizonak, jubenilak, kadeteak, infantilak, emakumeak, neskak eta hastapen futbola. Bestetik, departamentu bakoitzeko arduradunekin Komisio Tekniko bat osatu dugu, dena ondo koordinatzeko. Nire ametsa, klubean hiru gauza ezartzea da: lantalde txikiz osatutako eta funtzionamendu dinamikoko egitura bat; denon artean adostutako Kirol Eredu eta Hezkuntza irizpide jakin batzuk; eta egitura osorako metodologi progresibo eta zentzudun bat. Nik alde eginda hori geratzea gustatuko litzaidake.
Futbol eskola indartu nahi duzuela ere, esan duzue behin baino gehiagotan.
Zein dira emango diren pausuak?
Udalak Zubipe irailerako egongo dela esan digu, beraz, Futbol Eskolarekin aurrera goaz. Dagoeneko irekita dugu izen-emate epea eta ilusio berrituekin ari gara prestatzen. Adin bakoitzak bere arduradun espezifikoa izango du eta metodologia aldetik ere buelta txiki bat eman nahi diogu: beti ere gure heziketa irizpideen eskutik eta ariketa dibertigarrien bitartez, baina ahalik eta gehien eta egokien teknifikatu nahi ditugu haurrak. Dena den, guzti hau ere Zubipe prest dagoenean aurkeztu eta zabalduko dugu.