Hernanin, alkatetzarako PSEko hautagai izatetik, Miramon Parke Teknologikoko zuzendari izatera pasa zara. Aldaketa haundia izan al da?
Batera egin izan ditut beti, Hernaniko oposizioko lanak eta ohizko lanpostuko lanak, bai autonomo izan naizenean, eta baita Tolosako Industrialdeko Gerente izandakoan ere. Aldea ez da nabaria izan. Hala ere, Parkeko lanak denbora gehiago eskatzen dit, baina hernaniarrekiko dudan konpromisoa tinkoa da eta ez ditut ahazten bozeramaile sozialista gisa ditudan betebeharrak.
Nola sortu zen eta nola egin du aurrera proiektu berriak?
Zinegotzi sozialista eta Hirigintza Batzordeko kide izanik, proiektuaren hasiera eta garapena gertutik jarraitu ditut. Orain gainera, Parkeko zuzendari izanda, zuzenean kudeatzen dut, eta ohore haundia da niretzat, hernaniar naizen aldetik, gure herriaren garapen sozio-ekonomikoan laguntzeko aukera izatea. Proiektua sortu zen, Orona eta Donostiako Parke Teknologikoaren arteko elkarlanari esker sortu zen. Parke Teknologikoko bazkide haundiena Eusko Jaurlaritza da. Proposamenak, Hernaniko Udala osatzen genuen alderdi guztien aldeko iritzia jaso zuen. Hernanirentzat onuragarria izango dela iruditu zitzaigun, berrikuntza eta teknologia arloetan indarra emango baitio, eta lanpostu ugari sortuko baititu. Bai hemen eta baita nazioartean ere, berrikuntza teknologiko eta zientifikoen mapan hor azalduko da Hernani.
Zein azalera hartuko du Parkeak Galarretan? Nola banatuko da?
150.000 metro karratu inguru hartuko ditu, eta horietatik 108.000 eraiki daitezke. Azken hauen %60 Donostiako Parke Teknologikoarenak dira, eta gainerako %40 Ikasleku Fundazioak hartuko ditu. Hau, Orona enpresak, Mondragon Unibertsitateak, eta Ikerketa Teknologikoetarako Ikerlan-IK4 Zentroak osatzen dute. Bada beste partzela bat ere, eta seguruenik, hotel bat jarriko da bertan.
Zentro komertzial haundi bat ere jarriko dela esan izan da…
Orona eta Parke Teknologikoari dagokigun 10.5 Sektorean behintzat ez. Parkeko enpresa edo elkarte gisa onartuak izateko oinarri zientifiko-teknologikoa izan behar dute bertan jarriko diren enpresek.
Nola finantzatu da guztia, krisi garai honetan?
Proiektua Orona eta Parke Teknologikoaren arteko elkarlan publiko/pribatutik sortu denez, biena da ardura. Bizi dugun egoera ekonomiko zaila erronka bat gehiago bihurtu da, izan ere, gure errekurtsoak mugatuak baitira. Kostua 29.000 milioikoa da, soilik Parke Teknologikoari dagokionez eta etorkizuneko eraikitze lanak kontuan hartu gabe. Hala ere, Eusko Jaurlaritzaren erabateko konpromisoa dugu alde, eta beste laguntza batzuk ere baditugu.
Zure iritziz, zein izango dira Parkearen zabalkuntzaren onurak eta alde txarrak?
Hernanirentzat eragin oso onuragarria izango duela uste dut, eta seguru aski, aurrerago jabetuko gara hortaz. Parke Teknologikoa erreferentea da, eta Hernani horren partaide bihurtuko da, nazio mailan eta nazioarte mailan. Era berean, azpiegiturak hobetuko dira Galarreta inguruan... Hernaniarrak gonbidatu nahi ditut, urtero azaroan egiten den ate ireki jardunaldietara.