Pelotadenda martxan jarri zuenean, helburu garbi bat zuen Koro Barrenetxeak: pelotako materiala eskuratzeko zegoen zailtasunari aurre egin eta euskal kirol honetarako behar den guztia eskaintzea.
Hiru urte eta erdiko esperientziaren ondoren, beste hutsune bati aurre egiteko sortu du, orain, ‘Airez’ marka: «orain arteko marka gehienek haur eta gizonentzako erropa egiten dute gehienbat, eta guk txoko bat egin diogu emakumeentzako erropari».
‘Airez’ izena, zergatik?
Pelotarekin zerikusi haundia duen hitza dela iruditzen zait, eta aldi berean, aire berriak behar direla uste dut. Nolabait, zerbait hemengoa nahi nuen: euskal pelota. Eta pelota munduan, erropa mailan, aukera juxtua dago, baina merkatua badago. Horregatik, ikutu urbanoa, aire berriak.
«Enfoke globala eman diogu: pelota mundutik abiatuta, baina ikutu urbanoarekin, eta haur, gizon eta emakueentzat».
Nolakoa izan da marka berria sortzeko prozesua?
Erabat berria izan da neretzat. Urtebete pasatxo da ideia izan nuenetik. Ikusi nuen dendara etortzen zen jendeak zein joera zuen, eta konturatu nintzen bazela hutsune bat; orain arteko marka gehienek haur eta gizonei zuzendutako kirolerako erropa egiten zuten, eta galdetu izan didate: hau ez daukazu neskentzat?.
Horrela, hemengo kirola hartu nuen abiapuntu; pelota. Eta ikutu urbanoa eta emakumeari zuzendutakoa eman nahi izan dizkiot. Gero, diseinua profesional hernaniar batek egin du. Logoa sortu, ideia garatu, serigrafiara eraman... Hasiera honetan, marka atera dugu, diseinu berezi bat, eta horrekin jokatu dugu. Horregatik esaten dut guztiz made in Hernani egindako marka bat dela!
Harrera ona izan al du?
Oso kontentu nago ni. Enfoke globala eman nahi izan diogu: pelota mundutik abiatuta, baina ikutu urbanoarekin, eta haur gizon eta emakumeei zuzendua. Eta ikusita gazteei bideratuta egiten saiatu garela, eta erantzuna zein izan den... Eskaparatean uztailaren erdialdera jarri genuen, eta jendea etorri egin zait esanez gustatu egin zaiola. Zoriondu egin naute. Gaur egun, asmatzea ez da erraza eta ikusiko dugu, baina ondo dijoa. Kalitatea eta prezioaren arteko oreka ere ona da.
«Pixkanaka erropa gehiago eta akzesorioak aterako ditugu, eta irailean, webgunea jarriko dugu martxan, produktu guztiekin».
Erropaz gain, gauza gehiago ere sortu dituzue, ezta?
Hasieran, batik bat, erroparekin hasi gara. Baina pixkanaka erropa gehiago eta akzesorioak aterako ditugu: pelotarako materiala, palak, konplementoak, eskumuturrekoak, xorroak, motxilak... Jendeari aukera eman nahi diogu beste gauza batzuk edukitzeko. Lehenengo, jendeak zein erreferentzia hartzen dituen ikusten ari gara, eta asmoa da aukera zabaltzea.
Dendan erosteko aukeraz gain, online ere erosi daiteke?
Asmoa zen guztia lehentxeago ateratzea, baina azkenean, atzetik lan ordu asko dago! Diseinua garatzeaz gain, marka patentatzeko ere esan zidaten eta... Eskerrak laguntza izan dudan!
Webguneari dagokionez, orain, pelotadenda.com-en badago atal bat Airez markari zuzendua. Baina orain aurkezpen txiki bat besterik ez dago. Irailerako martxan jarri nahi dugu, produktu guztiak zerrendatu, eta erosteko aukerarekin!