[ELKARRIZKETA] AKELARREA - TITO ETA MILA:

Akelarrea 25garren aldiz aurten Hernaniko plazan.
Mila: Bai, eta gezurra dirudi. Egaña tabernan arratsalde batean egindako bilera batetik sortu zen dena. Berri­kuntza baten premia zegoen festen egitarauan.
Tito: Motz geratzen zen egitaraua eta zerbait desberdina asmatu nahi genuen. Koa­drilan sortu zen Akelarrearen ideia eta 1986an egin genuen lehen aldiz. Ahalegin haundia egin behar izan genuen, baina merezi izan zuen.

Beste nonbait egiten al zuten lehenago akelarrea?
Tito: Ez dut uste. Hernanin sortu zen Aelarrea eta geroztik hasi ziren beste tokietan egiten. Zugarra­murdin esaterako.
Mila:Zugarramurdikoak Hernaniko Akelarrea ikustera etorri ziren ideiak hartzeko. Herriak nolako harrera egin zion Akelarreari? Tito: Oso ona. Hiru hilabete lehenagotik hasi ginen herrian tailerrak antolatzen. Tokadoak, maskarak, jantziak... denen artean egin genituen.
Mila: Zoritxarrez material eta argazki asko galdu dira urteetan zehar, baina badaude lehen Akelarreko irudiak. Izugarrizko giroa antzematen da bertan, jende asko ikusten da kalejiran. Tito: Bukatu berri diren Olinpiadekin alderatuko nuke hori. Denetariko herritarrak bildu gintuen Akelarreak ere.

Toki gehiagotan ere egin duzue Akelarrea.
Mila: Toki askotan. Iruñako San Ferminetan, Nafarroako beste herri ugaritan, Bizkaia aldean, Bidangotzen,... Asti­ga­rragan ere bai pare bat aldiz. Aurten berriz egingo omen dute gainera Santiotan. Aurten adibidez, Emaku­mearen Na­zioarteko Egunaren harira, Antiguon egin dugu Akelarrea.

Une zailagoak bizi zenituzten.
Mila: Beheraldia izan genuen bai. Jende gutxik parte hartu zuen urteak izan ziren, baina zorionez buelta eman genion egoerari.
Tito: Gazte Asanbladaren bultzadak eragin haundia izan du horretan. Aurten 200dik gora gaztek dantzatuko dute kaleetan barrena Sorgin-dantza.

Eta Plazan egiten den antzerkia asko aldatu al da urteen joanean?
Tito: Hasieran, pertsonaiak ez ziren hain markatuak. Baina pertsonaiak sartu genituenetik ez da ia batere aldatu antzerkia.
Mila: Urtero saiatzen gara zerbait berria sartzen istorioan, baina pertsonaiak berdinak dira ia beti: akerra, sorginak, apaizak, donzellak,...

25garren urteurrenerako ariko zarete zerbait berezia prestatzen?
Tito: Bai. Hurrengo urtean os­patuko dugu. Horretan ere be­rezi samarrak gara, 26garren Akelarrearekin os­pa­tuko baitugu 25garren ur­teurrena, karkarkar.
Mila: Ari gara buruari buelta batzuk ematen eta ideia ba­tzuk atera dira gure artean. Jende beteranoak berriro parte hartzea nahi genuke. Ilusio bereziaz prestatuko dugu hurrengo urteko Akelarrea eta ziur nago espektakulu polit bat eskainiko dugula.