Udal Euskaltegiarentzat nola dator aurtengo matrikulazio kanpaina?
Izan dira urte batzuk matrikulazioa pixkana jaitsi egiten zena. Joan den
urtean inflexio puntua izan zen eta gora egin zuen. Gurean adibidez, talde bat
kanpoan utzi behar izan genuen, irakasle faltagatik. Gorakada horren arrazoi
nagusiak bi izan litezke, batez ere: bat, HABEk jarritako titulazio sistema
berria, eta bestea, Osakidetzan euskara plana martxan jarri izana.
Aurten espero duguna da goranzko joera horri eustea, behintzat. Bestalde, askoz
ikasle gehiago hartzeko aukerarik ere ez daukagu. Gauden irakaslegoa gaude eta
ez daukagu haunditzeko aukerarik.
Zein dira berritasun nagusiak?
Berritasuna izango da azken bi urteetako esperientzia pilotua zabaldu eta
sendotzea. Berez, orain dela bi urte hasi ginen astelehenetik ostiralera egunero
bi orduko formularen ordez, astean lau egunetan klasea eta bosgarrenean
tutoretza sartzen. Horrek aukera ematen du ikasleari jarraipen pertsonalizatua
hobeto egin eta bakoitzaren gabezia propioak lantzeko. Iaz maila guztietan
esperimentatu genuen formula hori eta aurten sendotu egingo dugu.
Ikastaro aldetik, EGA arteko maila guztiak eskainiko ditugu, goiz eta
arratsalde. Eta azken urteetan ikastaro bereziak ematen ditugu guraso eta
merkatarientzat.
On-Line ikastaroa ere izango dugu osasun munduko jendearentzat, Osakidetza eta
HABEren arteko hitzarmenetik datorrena. Ez dakigu zehatz noiz hasiko den eta
bere garaian adieraziko dugu.
Autoikaskuntza sistema moldatzeko modua ere aztertzen ari gara.
Metodologia aldetik nola erakusten duzue euskera, zeri ematen diozue
lehentasuna?
Guk euskera erabiltzeari ematen diogu lehentasuna. Metodologia prestatua
dago hizkuntzarekin gauzak egiteko, praktikan jartzeko. Gero, bai, osagarri
inportantea da erreflexioari tartea ematea: hitz egin bai, baina, gero
erreflexionatu gramatikan, diskurtsoan... Horrek lagundu egiten du. Formari
erreparatzen diogu, baina, beti erabilerari begira. Inglesean ere hori dago
orain punta-puntan. Material asko sortu dugu Hernanin horren inguruan, eta
gehiena argitaratuta dago.
Zerk bultzatuta dator jendea euskera ikastera?
Ikusten da bi arrazoi nagusi daudela. Batetik, jende askok ditu lagun
euskaldunak, euskeraz dakitenak familian, seme-alabak ikastolan... eta norbere
inguruarekin euskeraz hitz egin nahia bada arrazoi sendo bat. Orain, galdetzen
badiezu, eta titulurik atera nahi duzu? Ahal bada bai, erantzuten dizute.
Orduan, ba, nik uste bi arrazoi horiek elkar osatzen dutela.
Hasten direnetatik zenbatek ikasten dute?
Beno, hor faseak izaten dira. Hasieran, batzuei gogorra egiten zaie eta utzi
egiten dute, baina, jarraitzen duten gehienak ateratzen dute lehenengo titulua.
Gero iristen zaie puntu bat euskaltegikoa bakarrik ez dena nahikoa, eta kalean
landu behar dutena. Eta hor dago koxka. Batzuk moldatzen dira, eta besteak lanak
izaten dituzte. Hor kaleko ohiturek ere badute zer esana. Behar bada, Hernanin
euskeraz dakitenek euskeraz hitz egingo balute... Batzuk hor etsi egiten dute
eta handik urte batzuetara euskaltegira datoz berriro.