Arantzazu Zugasti kazetari hernaniarra da Noticias de Gipuzkoa egunkari berriko zuzendari albokoa. Egunkariak ia hiru hilabete bete ditu eta Zugasti oso gustora dago proiektu berriak jaso duen erantzunarekin. Hernaniarrak egunkariko bere bulegoan hartu du Kronika, bileraz bilerako egunari tarte bat kenduta.
2005eko azaroan atera zen Noticias de Gipuzkoa egunkari berria. Denbora
tarte horrek eman duenarekin zer balorazio egin duzue?
Askotan, hiru hilabete gutxi da, baina, gure aldetik oso balorazio ona
egiten dugu. Oso gustora gaude, bai helburu aldetik eta bai, enpresa aldetik.
Lehenengo momentutik guk azaldu nahi genuena zen egunkari berria ginela, eta
eduki berriak ere eskainiko genituela. Bestetik, orain arte Gipuzkoan egunkari
bakarra zegoen Gipuzkoa mailakoa, eta azkeneko 30 urteotan ia monopolio bihurtu
da. Egia da, baita, Gipuzkoako argazki ideologiko-soziologiko batekin horrelako
egunkari batek kontraesanak ere jartzen dituela mahai gainean. Hor, guk ikusten
genuen aukera bazegoela lana egiteko. Hortik aurrera, gure filosofiaren oinarri-oinarrian
dago egunkari transbertsala izan nahi dugula, iritzi ezberdinak plazaratzeko
plaza. Alde horretatik, guk distantzia planteatu nahi dugu alderdi oso konkretu
batzuekin oso lotuta dagoen prentsarekin.
Eta Arantzazu Zugasti nola sentitzen da proiektu berriaren zuzendari lanetan?
Zuzendariari galdetzen badiozu, esango dizu asko kosta zitzaidala baietz
esatea (erdi brometan). Oso seguru sentitzen naiz, alde batetik, goitik bidea
norbaitek urratu didalako, eta bestaldetik, atzetik izugarrizko ekipoa
daukadalako. Ikaragarria! Guztira, 70 pertsonako lan taldea gara, eta horrek
izugarrizko babesa ematen dizu.
Gero, nik epe luzerako mentalitatea daukat, eta gustatzen zait jakitea nora joan
behar dugun. Hori buruan edukitzea eta neurtzea informazio bakoitza zer izango
den, hori da nik dudan erronka, ez prentsaurreko batera joan edo bestera joan.
Lan giroa ona izatea ere oso garrantzitsua da. Lan giro onarekin erdia egina
daukazu. Guk oso ona daukagu eta horri eustea da nere beste erronka bat.
Kontatu egun bateko lana
Goizean 10:00ak aldean hasten naiz, eta goiza nahiko lasaia izaten da. Lana
bezperatik antolatua dago. Eguerdian, 13:00ak aldera bilera egiten dugu egunak
dakarrena aztertzeko (gero dena goitik behera aldatu liteke, baina, beno). Gero,
gu hiru egunkari gara taldean -Nafarroa eta Arabako Diario de Noticias eta gu-
eta daukagun informazioa nola antolatu ere koordinatzen dugu. Informazio hori
guztia nola koordinatu eta nola atera etekin gehiena, hori da aurrera begira
dugun erronka haundietako bat. Eta alde komertzialerako ere aukera haundiak
ematen ditu.
Arratsaldean, erredaktore buru bakoitzak bere saila antolatzen du, informazio
bakoitzari dagokion espazioa emanez eta nere lana da iritzi saila antolatzea.
Azkenik, iluntzeko 20:00etan gai nagusi guztiak mahai gainean jarri, egunak eman
dituenak eta geuk sortuak, eta portada antolatzen dugu denon artean. Hori da
ariketa politena, arriskutsuena, hurrengo egunean neurtuko zaituena.
Ze kriterioren arabera ematen diozue titularra gai bati edo besteari?
Gu, azkenean, Gipuzkoako egunkari bat gara. Zenbait gauzetan sortzen den
gaia sortzen dela horrek dauka garrantzia. Horrek ez dauka bueltarik. Baina, guk
gai propio asko sortzen ditugu eta gai sozialetan oinarritu dugu gure lana.
Horrek aukera pila bat ematen dizu. Ze, hor daude eguneroko bizimoduko gauzak,
zerikusia daukatenak zure bizimoduarekin, zure familiako egoerarekin, bizitzaren
antolaketarekin... Eta horrek titular oso politak ematen dizkigu. Gureak baldin
badira horri ematen diogu lehentasuna. Hori da apustua.
Noski, horrek ez du esan nahi politikan sartzen ez garenik, noiz eta orain.
Baina, politika gaietan saturazio puntu bat dago.
Gai sozialak dira orduan zuen apustuaren oinarri?
Bai, hasieratik, eta lan taldea bera ere egituratuta daukagu maila horretan.
Gai sozialetan egunero 5-6 lagun dabiltza lanean. Eta gai sozial asko
herrietatik ateratzen ditugu. Guk Gipuzkoako ikuspegia ematen dugu, Gipuzkoa
begirada batean, hori da gure planteamendua. Eta Gipuzkoa oso txikia denez,
berehala jabetzen gara herri bateko gai sozial batek Gipuzkoa osoko
transzendentzia daukala. Hernanin txotxeko gaiarekin gertatzen da hori, edo
Irunen garbitasun grebarekin edo beste gai askorekin. Eta horrek izugarrizko
jokoa ematen digu.
|
ETBk Nafarroan izan zuen aurreneko korresponsaria eta Herri Irratian eskolatutako kazetaria Arantzazu Zugasti komunikazioaren alor ezberdinetan ondo zaildutako
pertsona da, eta gaztetatik. Iruñean kazetaritza ikasten hasi eta Arturo
Kanpionen euskerazko klaseak ematen ari zela ETBk fitxatu zuen Nafarroako
korresponsari lanak egiteko. Bera izan da ETBk Nafarroan izan zuen
lehenengo berri emailea «Badakizu, gaztea-ta» dio Arantzazuk ezpainei
kozka eginez ardura hari baiezkoa errexegi esan izan balio bezala. Karrera
bukatzean Hernanira bueltatu eta Herri Irratian eskaini zuen bere burua. «Herri
Irratia nere etxeko saloiaren prolongazio bat bezela zen, egunero eta egun
osoan entzuten genuen». Hartu egin zuten, eta Mariano Ferrer, Koldo
Ordozgoitik eta Karmele Aranburu bezalako kazetariekin aritu zen eskuz
esku, lau urtetan. Kazetaritza ulertzeko eta lantzeko modua hor finkatu
zituela dio Arantzazuk: sentidu kritikoa, norbere gaiak lantzea ikuspegi
guztiak kontuak hartuta... «Herri Irratia izan da nere eskola» dio.
|