Chillida-Lekuko kontzertuarekin hasi baino lehenago: Zein izan da zure
ibilbidea orain artean?
Hemezortzi urte egin arte Donostian izan nintzen solfeoa, armonia eta pianoa
ikasten. Tronpeta ere ikasi nuen pare bat urtetan. Gero Londresera joan nintzen
Guildhall School of Music and Drama eskolan pianoko goi mailako ikasketak
egitera, sei urtetan.
Zergatik Londresera?
Hemen ez zegoen horrelako ikasketarik, ez zegoen Musikene, gaur egun bezala.
Hala ere bazeuden irakasle onak, baina egia esan ez zegoen esperantza
haundiegirik ikasketak hemen jarraitzeko.
Ordutik gauza asko egin dituzu, Ezkaraien, RNEn...
Ezkaraien musika jaialdi bat antolatu nuen eta polita izan zen iraun zuen
bitartean. Tamalez politikariek dena izorratu zuten. RNErentzat grabazioak egin
ditut eta leku askotan jo dut: Madrilen, Malagan... maiatz honetan Finlandian
izan naiz klase magistralak ematen. Orain Musikeneko irakaslea naiz.
Zer uste duzu aportatzen duela Musika Hamabostaldiak?
Hamabostaldia Europako jaialdi garrantzitsuenetakoa da. Kalitate haundiko
musika eskaintzen du. Gaur entretenimenduaz asko hitz egiten da, baina nik uste
dut musika ez dela entretenimendu soila, sentimenduak eta giza borondatea
espresatzen ditu. Bertako musikarientzat berriz, aukera paregabea da. Musikariei
lehenengo etxean entzun behar zaie, gero kanpoan entzun ahal izateko. Dena den,
Hamabostaldian beharrezkoa da kanpoko musikari onak ere ekartzea.
Zure errezitaldiak Biktimei omenaldia izena du, IIgarren Mundu Gerraren
60garren urteurren honetan...
Mundu Gerraren biktima izan diren hainbat pertsona ezagutu ditut. Nire
irakaslea, Edith Vogel, judutarra zen eta ihes egin behar izan zuen ahizparekin,
bere gurasoak kontzentrazio gune batean hil ziren. Klase ondoren bere etxera
laguntzen nuen eta historia asko kontatu zizkidan; musikak asko lagundu zion
egoera hura gainditzen. Nire beste irakasle bat berriz, James Gibb, Normandiako
lehorreratzean izan zen.
Zer lortu nahi duzu errezitaldiarekin?
Biktimak gogoan izatea, ez daitezela ahaztu guzti hura jasan zuten
pertsonak.
Nolatan proposatu zizuten Hamabostaldian jotzeko?
Chillida-Lekuko ekitaldiak Alejandro Zabala Musikeneko zuzendariak antolatzen
ditu eta berak proposatu zidan. Joko ditudan piezak Musikeneko irakasleek
konposaturikoak dira; konpositoreei arreta gehiago jarri behar zaie.
Jotzeko leku egokia ahal da Chillida-Leku?
Leku harrigarria da. Kultura eta sentsibilitatea zaindu dituen jendea da eta
detaile guztiak zaintzen dituzte.
Zein motatako pianoa duzu?
Alde horretatik zortea daukat, nire anaia piano errestauratzailea da eta
baita afinatzailea ere. Mekanika berria baina antzinako egurrez eginiko bi piano
ditut. Hala ere, pianoak ez ditut garraiatzen, tenperatura aldaketekin asko
sufritzen baitute. Antolatzaileek eskainitako pianoarekin jotzen dut.
Etorkizunerako?
Aurten kontzertu bat konposatu dut Gustavo Diaz Jerez-i dedikatua, nahiko
nuke orkestraren batek jotzea. Batez ere sormen giroa sustatzeko lan egin nahi
dut, konpositoreak ez daude baloratuta.