|
Zer moduzko sagardoa dator aurten Rufinon?
Nik uste sagardo ona datorrela, iazko tankeratsukoa. Aurten hemen iaz
baino sagar gutxiago izan da, (halere, gure sagastietan iaz baino gehiago
bildu dugu) eta Galiziatik eta Frantziatik ekarri behar izan dugu. Baina,
kanpotik ere sagar ona etortzen da eta aurten ere sagardo ona izango da.
Noiz hasi zinen iaz sagardo egiten?
Iraila bukaera aldera hasi nintzen, eta azaro erdi aldera bukatu. Begira
gauzak nola diren, lehengo urtean sartu nuen hotza (tenperatura
erregulatzekoa) eta aurten berotzen aritu naiz. Muztioak irakiteko ez da
gehiegi hoztea komeni, bestela gozoegia gera litekeelako. Iraila eta urrian
egindakoa normal joan da, baina, azaroan hotz dezenteak egin zituen, eta
berotzen aritu naiz, bai.
Nolako sagardoa egitea gustatzen zaio Javier Ansorenari?
Zapore ona duena, edanerreza, eta azidotasun gutxi, baina, gutxiegi ere
ez. Nik uste jendeak ere sagardoari eskatzen diola azidotasun punttu bat.
Eta zein da Rufinoren sekretua hori egiteko?
Esan ezkero ez litzateke sekretua izango! Aurrena, lehen gaia ona izatea
da garrantzitsua, sagarra ona. Eta bakoitzari komeni zaion neurrian nahastu
geza eta gazia. Normalean Frantziako sagarra geza izaten da gehiena. Eta,
gero elaborazioan kontu haundia izan behar du. Batetik garbitasunak
inportantzia haundia du. Eta, bestetik, ba, lehen esan dizudan bezala, ez da
berdin urrian egindako sagardoa edo azaroan egindakoa. Irakinaldia oso ondo
zaindu behar da.
Txotx denboraldia normalean baino motzaxeagoa egiten du Rufinok?
Iaz hilabete eta erdi egin nuen eta aurten bi hilabete egiteko asmoa
daukat. Otsailaren aurrenetik martxoaren azkenera. Lehenago ere zabaldu izan
dut, baina, jendea ere otsaila erdi aldera hasten da mugitzen. Eta, bestetik,
ba, sagardoa txotxean zenbat eta gutxiago kastigatu hobe.
Alderdi horri asko erreparatzen al dio Rufinok?
Bai, bai. Txotx garaia hor dago, baina, gu, azken batean, botilatik bizi
gara, eta hori zaintzen dugu gehiena.
Jende aldetik zer esperantza daukazu denboraldirako?
Iaz ere jendea ibili zen eta aurten ere nik uste ibiliko dela. Gurean
gehiena inguruko jendea ibiltzen da. Tokia ere 80 bat lagunentzakoa da,
autobusik ez dugu hartzen.
Agenda hasi al da mugitzen?
Bai, mugitzen hasi da bai. Jendea hasi da galdezka eta batzuek eguna
hartu dute.
Sagardoa eta enologoa elkarrekin gero eta gehiagotan entzuten diren bi hitz
dira. Nola ikusten duzu gaia. Pasatako eztabaida da eta sagardo ona egitea
da kontua, lagundutako sagardoa eta lagundu gabea bereiztearen aldekoa al
zara...
Sagardo ona egiteko ez dago enologo beharrik. Sagarra ona izan eta
elaborazioan kontu izan ezkero, sagardo ona egin liteke enologorik gabe.
Baina, enologoa ez genuke etsai bezala hartu behar. Sagardoak ere problemak
izaten ditu. Batzuetan konpontzen dira, eta bestela binagretarako. Nik
normalean ez dut enologorik ibiltzen.
Non banatzen da Rufinoko sagardoa?
Gehiena partikularrek hartzen dute, % 50 inguru esango nuke nik.
Lehendik ere ohitura haundia genuen jendeari partitzeko eta orain ere eusten
diogu horri. Noski, lehen askotan bila etortzen ziren eta orain geronek
eramaten diegu. Gero, beste % 40 inguru taberna eta jatetxeek hartzen dute,
eta % 10 inguru banatzen dugu dendetan. Inguruari dagokionez, berriz,
Hernanitik Tolosa eta Oriora bitartean banatzen dugu gure sagardoa.
Erretzerik izango al da Rufino sagardotegian?
Legea aplikatzeko zortzi hilabete daude eta aurtengoak horrela beharko
du. Ez dugu galeraziko, baina, kartelak jartzeko asmoa daukat ahal den
gutxiena erretzea eskatzeko. Ikusiko dugu.
|
|
Sagardo mota
«Nik bilatzen dudan sagardoa da sabore
onekoa, edanerreza eta azidotasun gutxikoa, baina, gutxiegikoa ere ez.
Jendeak eskertzen du azidotasun pixka bat».
Inoxidablea
«Sagardo ona egiteko garbitasuna oso
garrantzitsua da eta horretan kulpel inoxidableak egurrezkoak baino askoz
egokiagoak dira».
Enologoa
«Sagar ona eta elaborazioan kontu izan
ezkero, sagardo ona egiteko ez da enologo beharrik. Baina, enologoak ez
ditugu etsai bezala hartu behar. Sagardoak ere izaten ditu arazoak. Nik
normalean ez dut ibiltzen».
Denak batera
Rufinok uste du sagardoaren sektorean
denak batera lan egitea dela etorkizunari heltzeko modu onena, baina,
aitortzen du ez dela lantegi erreza. «Bakoitzak bereari begiraten diogu ta...
»
Gutxi erretzeko eskaera
Tabakoaren legeak betez bete harrapatu
ditu sagardozaleak. Rufinok aurten ez du erretzea galeraziko, ahal den
gutxiena erretzeko eskatzen duten kartelak jartzeko asmoa du. |