San Joan jaiak hernaniar batentzat bereziak dira beti, baina zer sentitzen da txupinazoaren parte izango zarenean?
Ez dakit zer sentituko dudan momentu horretan, baina esan zigutenean txupinazoa bota behar genuela poza sentitu nuen. Azken finean, jaietako ekitaldi garrantzitsuenetako bat da, eta, betiere, zu horren protagonista izatea pozgarria da.
Nork eman zizuen berria?
Bilera batean atera zen Jai Batzordean gure hautagaitza aurkeztuko zela. Horregatik, egia esan, ez zen notizi berezia izan, aurretik bagenekielako.
Nor izango da Arraun Elkarteko ordezkaria Udaletxeko balkoian?
Aurten urte garrantzitsua da berrogehita hamar urte egin ditugulako, baina, baita ere, lehenengo aldiz emakumeen trainerua aterako dugulako. Orduan, ez dakigu seguru zeinek piztuko duen suziria; badakiguna da han egongo garenak nesken trainerukoak izango garela, batez ere, baina baita taldeko gazteenak ere.
Ba al dakizue nola izango den San Joan bezperako egun hau?
Hasieran harrera bat izaten da udaletxean eta han omenaldi txiki bat egiten dute. Gero txupinazoaren momentua izaten da: balkoira atera, txupinazoa bota, hiru hitz esan eta banderak igotzen diren momentua. Hortik aurrera, ez dakigu zer pasatzen den. Guk, gure aldetik, ez dugu ezer berezirik prestatu egun horretarako.
Dena den, ez da aurten ospatzeko duzuen bakarra: lehen aipatutako 50.urteurrena, ‘Maialen’ trainerua, egoitza berriaren inaugurazioa... Urte ona izan duzue, ezta?
Oraintxe hasi gara gauza hauekin, orain arte prestakuntzak izan dira, eta urteurrenari ez diogu garrantzia gehiegirik eman inaugurazioa iritsi den arte. Urtea, ez dakit, baina uda honek bai daukala guretzako xarma berezi bat. Urte hau izango da dena markatuko duena.
Orduan, hemendik aurrera zein dira zuen erronkak Arraun Elkarte bezala?
Oraingoz nahi duguna da harrobia landu eta jende gaztea erakarri. Badakigu zaila dela, baina saiatzen ari gara jendearengana iristen eta herrian ikusi dadila arraun elkartea dagoela eta etorkizun pixka bat badaukagula.
Bukatzeko, ze mezu helarazi nahi diezu hernaniarrei gaur hasten diren San Joanen inguruan?
Ondo pasatzeko, herria zaintzeko, parte hartzaileak izateko festetan eta 27an jarriko dugun postura etortzeko pintxoak jatera eta kamixetak erostera. n