25. Urteurrena ospatzen duzue aurten eta, gainera, borobiltzeko, txupinazoa botako duzue. Pozik?
Bai, oso pozik. Edozein hernaniarrentzat festei hasiera ematea polita da, ezta? Eta ez hori bakarrik, 25 urteko ibilbidea borobiltzea ere bada.
Zergatik aukeratu ote zaituzte Jai Batzordeak?
Agian, jendeak baloratzen duelako 25 urtez ekintza bat herrian bertan eta herriko jendearekin egin izana. Gainera, parte hartzen dugu herrian egiten diren ekintzetan, Gabonetan, Santa Agedan, San Joanetan... beti egon gara herriko gauzetan.
Nork ordezkatuko du Kantuz udaletxeko balkoian?
Oraindik ez dugu hitz egin. Esan digute nahi dugun guztiok joan gaitezkeela, baina nolabait antolatu behar duguna dela: nork igoko duen ikurriña, nork botako duen etxeferoa, nork esango duen zerbait... eta hori arraunlariekin hitz egin beharko dugula. Uste dugu momentuan bertan erabakiko dugula; seguruenik ilusio gehien egiten dionak egingo du.
Eta, bestela, talde bezala San Joanetan zerbait berezia egiteko intentziorik ba al duzue?
Bai, ekainak 23 arratsaldean beti kontzertua ematen dugu Ozenkirekin batera. Egun berean, 25 urte hauetan, beti afaltzera joan izan gara elkarrekin, eta horrelako ohiturak ez dira aldatu behar.
Ekintza dezente egin dituzue 25. Urteurrena ospatzeko, ezta?
Bai, ikasturte potentea izan da, dena berezia izan delako. Ekintzetatik borobilena, gure ustez, Kantuz Eguna izan da, gure eguna ospatzeko maiatzean emandako kontzertua. Gainera, urteurrena ospatzeko kruzero bat ere egin dugu.
Etorkizunerako erronka berririk bai?
Datorren ikasturtera begira, interkanbioak egiteko asmoa daukagu: Donostiako abesbatza batekin, Zarautzeko beste batekin... Eta gustatuko litzaiguke nazioarteko interkanbio bat ere egitea, baina oraindik ez daukagu ezer zehaztuta.
Zer esango zeniekete hernaniarrei gaur hasten diren San Joanei begira?
Ondo pasatzeko, antolatzen diren gauzetan parte hartzeko eta txupinazora joateko. Horrez gain ere, adin guztietako jendea animatzen dugu gurera: giro oso ona dago eta ez da bakarrik kantatzea, hortik kanpo ere oso harreman polita daukagu eta oso ondo pasatzen dugu.