Hernaniko Zuhaitz Egunak 50 urte bete ditu aurten, baina askoz ere lehenago egin zuten estreinako aldiz: 1905eko abenduaren 16an, zehazki. Hortaz, urteurren borobil-borobila izan da gaurkoa, 120 urte bete baitira aurreneko Zuhaitz Egun hartatik.
Santa Barbarako magalean egin zuten orduan, festa giroan. Herriko plazan elkartu ziren Hernaniko eskoletako ikasleak, arratsaldeko ordu bietan; eta udal ordezkariekin batera joan ziren Santa Barbara aldera, txistulariek lagunduta. Arrigoain baserriaren inguruan egin zuten intxaurrondoen landaketa. Lanak egin ondoren, eta instituzio ezberdinetako ordezkarien hitzaldiak entzunda, merienda egin zuten haurrek zein helduek, eta iluntzean bueltatu ziren herrira, berriro ere txistu eta danbolin doinuen laguntzaz.
Garai hartako egoeraren eraginez egin zuten aurreneko Zuhaitz Egun hura. XIX. mendeko Karlistaden ondorioz, desamortizazio prozesuak izan ziren, eta lur publiko asko pribatizatu zituzten. Gainera, baso asko moztu zituzten, ganaduarentzat azpiak egiteko iratze-tokiak sortzeko; eta era berean, gaixotasunak azaldu ziren haritzetan eta gaztainondoetan, ehunka arbol moztera behartuz.
Horrek ekarri zuen basoak soiltzea, eta XIX. mende horren bukaeran, mendiak basoberritzeko beharra azaleratu eta indarra hartzen hasi zen. Eskoletan ere piztu zen basoarekiko interesa, eta horren emaitza izan zen Hernaniko aurreneko Zuhaitz Eguna, oso goiztiarra izan zena Gipuzkoan.
