Eguraldia lagun izan zuten igandean Osiñaga auzoko ekoizleek, eta giro paregabea sortu zen Udazkeneko Azokaren estreinako edizioan. Itxas-Buruko parkinean izan zen azoka, eta bete-betean asmatu zuten, herritar ugari bertaratu baitziren bertara, ekoizleen postuetan gustuko produktuak bilatu, eta goizaz gozatzera. Guztira lau postu jarri zituzten azokan, auzoko sei ekoizleren produktuekin: Lurrarekiko Harremana, Perrapa baserria, Arriatzu baserria, Zatika diseinuak, Telleria haragiak eta Txintxuenea. Hori horrela, denetik izan zen eskuragarri azokan: haragia, gazta, barazkiak, bitxiak... Sagardoa edan eta pintxoak jan bitartean, Kimetz Oiñederrak erakustaldi ederra eskaini zuen, eta jarraian, Andoni Mujika 'Anatx', Iker Ormazabal 'Tturko' eta Eñaut Martikorena bertsolariek eman zioten amaiera goizeko giro ederrari.