Hernanin bizi den gizon bati 26 urteko kartzela-zigorra egotzi zioten 79 urteko amari tratu txarrak emateagatik eta bortxatzeagatik. Joan den ekainaren 21ean hasi zen epaiketa, Gipuzkoako Audientzian, biktimaren deklarazioarekin. Bost hilabeteren ostean, aste honetan eman dute aditzera epailearen erabakia.
«Kontraesanak daude»
Gertaerak duela hiru urte izan ziren. Espetxean hainbat urte pasa ostean, akusatua amaren etxera itzuli zen, Hernanira. Emakumeak, momentu hartan, 79 urte zituen. Antza denez, bizilagun batek Ertzaintzara deitu zuen istilua sumatu zuelako 2018ko apirilaren 18an.
Orain, sententziak dioenari erraparatuta, frogatuta gelditu den bakarra da akusatuak bere amaren «bularra kolpatu zuela» eta haren «ahoa estali zuela eskuarekin, oihu egitea galarazteko asmotan». Gainerakoa argitzeko berriz, hau da, bortxaketa eta sexu-erasoen delituak, nahikoa froga ez dagoela ondorioztatu dute. Are gehiago, Tribunalaren esanetan, «kontraesanak daude» amaren testigantzetan.
Fiskaltzak eta akusazio partikularrak 26 urteko espetxealdia eskatu zuten penetrazioarekin izandako sexu-eraso delituagatik, bi sexu-eraso sarketarik gabekoaren delituagatik, irain eta mehatxu delitu arinengatik etxeko bortxaketaren esparruan, eta tratu txar ez-ohikoaren delituagatik. Bestalde, defentsak, Iñigo Iruin letratuak ordezkatuta, tratu txar ez-ohikoen delituagatik izan ezik, gainerako delitu guztietatik absolbitzeko eskatu zuen.
Esanak esan, aste honetan argitu dute guztia eta, azkenean, tribunalak 8 hilabeteko espetxe-zigorra eta 1.900 euroko indemnizazioa egotzi dio akusatuari amari eragindako kalte fisikoengatik eta psikologikoengatik.
