Azken egunetako datuen joerari eutsi dio Hernanik gaurkoan, Covid-19 kasu positiboen gorakadarekin. Eta pandemia osoko kopururik haundiena izan du, gainera, beste koxka bat gora eginda: 65 positibo atzeman dituzte herrian, azkeneko egunean egindako probetan. Atzo azaldu zutenez, 300 proba ziren egitekoak, Hernaniko osasun zentroan.
65 horiekin, guztira 161 kasu positibo izan ditu Hernanik, azkeneko hiru egunetan; eta 175, azkeneko lau egunak hartuta: 14 izan ziren astearteko datuetan, 52 asteazkenekoetan, eta 44 atzo eman zituztenetan. Hori horrela, 939,18ra igo da intzidentzia-tasa, herrian. Euskal Autonomia Erkidego osoan, tasarik altuena daukan herria da Hernani, alde nabarmenarekin. Izan ere, beste herri bat bakarrik dago eremu gorrian, erkidego osoan: Zumaia, 498,63ko intzidentzia-tasarekin.
Azkeneko egunean, 406 kasu positibo atzeman dituzte EAEn; horietatik 170 Gipuzkoan, eta probintzia osoko %38a Hernanin.
