Karmen jairik ez da izango Kaxkoan, ostegunean

Egun osoko festa bertan behera uztea erabaki du Kaxko elkarteak, COVID-19a dela eta.

Egun seinalatua izaten da uztailaren 16koa, Karmen eguna, Hernaniko Kaxkoan. Baina ez da ospakizunik izango bertan, aurtengoan: Karmen jaiak bertan behera uztea erabaki du Kaxko elkarteak, COVID-19aren eraginez bizi dugun egoeragatik. Gauzak horrela, ez dira egin­go urtero egun horretan anto­latu ohi diren ekintzak: merkatariei omenaldiak, alkate izendapena, haurrentzako jolasak, kaleko jokoak eta karta jokoak, sardin jatea, balkoi ede­rrenaren lehiaketa... Eta ez dute jarriko Kaxkoko Ama Birjina ere, urtero bezala, Karkaban.

Erabaki horrek, herriko gainerako festetan hartutako ildotik jarraituko du. Orain arte, bertan behera geratu dira Florida-Etxeberri, Osiñaga eta Martindegi auzoetako jaiak, San Joa­nak, eta baita Ereñotzuko San Antonioak ere.

Bere jarduera etengo du Kaxko elkarteak, urtarrilera arte

Era berean, Kaxko elkarteak jakinarazi du, bere jarduera eten eta atseden hartuko duela, pandemiaren eboluzioa zein den ikusi bitartean. Hortaz, Plaza Berriko liburutegia ere ez dute martxan jarriko, hartu beharreko segurtasun neurriek ez du­telako ahalbidetzen.

Printzipioz, urtarrilean helduko die Kaxko elkarteak berriro, bere ekimen eta egitasmoei. Eta bitartean, elkartearekin harremanetan jarri nahi duenak, eskura dauka posta elektronikoa: kaxkoelkartea@gmail.com.