Gaurko jarri dute odola emateko zita, oraingoan ere Goiz Eguzkin

Toki gehiago eta espazio irekiagoa daukate Goiz Eguzkin, estrakzioak egiteko.

18:00etatik 20:30etara izango da, jubilatuen egoitzan; baina ordua hartu behar da gaur goizean, jende pilaketa saihesteko.

Hileko aurreneko asteartea da, eta beraz, odola emateko hitzordua daukate gaurkoan, hernaniarrek. Arratsaldeko 18:00etatik 20:30etara izango da horretarako aukera, eta aurreko hilabete­­otan bezala, Goiz Eguzki jubila­­tuen egoitzan egingo dute, Koro­na­bi­ru­saren pandemiaren eragi­nez.

Eta aurrekoetan bezala, odola eman ahal izateko, aldez aurretik hartu beharko da ordua, oraingoan ere. Horretarako, telefonoz deitu behar da gaur goizean zehar, 08:30etan hasi eta 14:00ak arte, zenbaki honetara: 943 00 78 84. Izan ere, jende pilaketak saihestu behar dituzte, eta txandak antolatuko dituzte Hernaniko Odol Emaileen elkar­teko, horretarako.

Apirilean hasi ziren estrakzioak Goiz Eguzkin egiten, toki egokiagoa zelako, osasun alarma egoeran. Ordutik, hilero egin dituzte bertan. Izan ere, nabarmendu dutenez, «beharrezkoa» da odol emate lanekin jarraitzea, COVID-19ak eragindako ego­era honetan ere, «Odol Bankuak jarrai dezan beharrezko odola izaten, ospitaleak hornitu ahal izateko». Horregatik, herritar guztiak animatu dituzte, gaur goizean ordua hartzeko dei­­tu, eta odola ematera.

Ekaineko hitzorduan, hilaren 2an, 42 izan ziren odol emateak, maiatzean baino 9 gehiago. Hori horrela, espero dute bes­te koxka bat gora egitea estrakzioek, oraingo txandan ere.