Andoni Tolosa Morau artistaren emanaldia ikusi ahal izan zen asteazkenean Hernani Kulturak maiatzerako prestatutako online programazioaren barruan eta maiatza amaitzeko ikuskizun potoloa dago iragarrita. Xabi Solano musikariak kontzertua eskainiko du gaur, arratsaldeko 19:30etan hasita.
Hau ikusteko, ohi bezala, Hernaniko Udalak YouTuben daukan kanalean sartu beharko da, 19:30etan, eta bideoa bilatu. Kronikak ere, albiste honetan bertan txertatu du bideoa, www.kronika.eus webgunean, emanaldia topatzea errazteko asmoz.
Solano hernaniarrak abenduan aurkeztu zuen Bi, bakarka grabatu duen bigarren diskoa. Bi diskok osatzen dute Bi: bata abesti berriekin osatutakoa da, eta bestea, bertsioekin. Gaurko emanaldian disko horretan entzun daitezkeen abesti desberdinak entzun ahal izango dira, abesti berriak eta zaharragoak.
Ekainean jarraituko dute saioak bost emanaldirekin
Xabi Solanok gaur eskainiko duena maiatzeko azkena izan arren, ekainean oraindik ere jarraipena izango du Hernani Kultura online ekimenak.
Kulturaz gozatzeko aukera eman nahi izan du Udalak ekimen honekin. Maiatzean jarri zen martxan online programazioa, eta ordutik, ipuin saioak, literaturari buruzkoak, musika emanaldiak, dantza emanaldiak... ikusi ahal izan dira asteazken eta ostiralero.
Ekainean ere beste horrenbeste izango da. Hasteko, ekainaren 3an, asteazkenean, Beatriz Egizabal eta Kontukantoirekin ipuin orduaz gozatu ahal izango da, 18:00etan.
Ekainaren 5ean, ostiralean, berriz, Vito Rogado aktorearen antzerki emanaldia izango da, 19:30etan.
Ekainaren 10ean, 18:00etan, bertsolaritzaren txanda izango da: Eñaut eta Unai Agirre anaiek Bertso zahar eta berriak, auskalo zeinek eginak emanaldia eskainiko dute.
Ekainaren 12an, bestalde, Nagore Legarreta argazkilariaren erakusketa ikusi ahal izango da arratsaldeko 19:30etatik aurrera.
Eta online programazioari bukaera emateko, ekainaren 19an Ainhoa Larrañaga musikariaren emanaldia izango da 19:30etan.
