Emozioen atzean dauden beharrak identifikatzeko saioa, gaurko Foroan

Kronika - Erredakzioa 2020ko mai. 27a, 00:00

Zoom bidezko talde txikietan egin nahi du gaurko saioa Tratu Onen Herriak, 18:00etan. Izena emateko: 'hernanitoherri@gmail.com'

Arremanitz kooperatibak beste foro bat antolatu du gaurko. Helburua izango da, «itxialdian bizitako egoera berriek eragindako emozio zurrunbiloen atzean ezkutatzen diren beharrak identifikatzea», behar indibidualetatik hasi, eta behar kolektiboetara iristeko.

Giro goxoan aritzeko, talde txikiak antolatu nahi dituzte, eta beraz, izena emateko eskatu dute, hernanitoherri@gmail.com helbidera idatzita. Foroa gaur egingo da, 18:00etatik 19:30etara, Zoom bidez.

 

Sostengurako materiala eta komunitatearen indarra

Saioan behar indibidualak eta kolektiboak identifikatuko dira. Hasteko, norberaren beharrak identifikatu eta sostengurako baliagarriak izan daitezkeen materialak partekatuko dira. Batetik, Berexi Art, Uxue Bereziartua artistarekin elkarlanean egindako bideo bat, eta bestetik, eneritz.ilustratzaile-aren opari lagungarri bat.

On zerk egiten digun edota zeren falta sumatu dugun aztertuko da, besteak beste.

Ondoren, «zaintzen krisia horren agerian geratu den garai honetan», komunitatean gertatzen diren beste errealitate batzuei erreparatzeko tartea ere hartuko da, ikusteko, zein behar berri sortu diren edo zeintzuk areagotu diren, eta antolatuta gauden edo ez. «Komunitateak egiten gaitu indartsu, eta ezinbestekoa izango da komunitatearen beharrei ere erreparatzea».

Saioa Udalarekin eta Berdintasun Kontseiluarekin elkarlanean antolatu da.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!