Nola ezin jakin badaiteke ere, oraingoz, Jai Batzordeak badauka San Joanak nolabait ospatzeko asmoa. Badirudi Eusko Jaurlaritzak asteburuan erabakiko duela festak ospatu ahal izango diren ala ez, eta egitekotan, zein neurri hartu beharko diren.
Bitartean, Hernaniko San Joanak prestatzeko lanetan ari da Jai Batzordea.
Proposamenak, gaur arte
Argi dago ezingo dela ohiko programazioa osatu, eta hori horrela, programazio alternatibo bat osatzeko lanean hasi dira Jai Batzordea eta Udala, elkarlanean. Hori osatzeko, proposamenak egin daitezke. Gaurkoa da horretarako azken eguna. Ideien berri paulo-j@hernani.eus helbidera bidali behar da.
Bestalde, bideo bidezko bilera ere deitu da gaia lantzeko. Datorren asteazkenean egingo da, hilak 13, 19:00etan, https://meet.jit.si/sanjoanak helbidean.
Kartela aukeratzeko, azken eguna
Bestalde, jaiak iragarriko dituen kartela aukeratzeko lehiaketa egin da aurten ere, eta Jai Batzordeak aukeratuta, jasotako 12 proposamenetatik 4 pasa dira finalera.
Horien artean, 16 urtetik gorako herritarrek aukeratu dezakete gehien gustatzen zaiena, www.hernani.eus webgunean botoa eman da. Gaurkoa da horretarako azken eguna.