Konfinamendua hasi zenetik, denetik antolatu dute Lizeaga auzoan, Madalena plazatxoaren inguruan. Eta gaurko jarri du hurrengo zita, Maritxu Balkoi Auzo Taldeak: guatekea egingo dute, 13:00etan hasita. Bideo bidez luzatu dute gonbidapena, Mr. eta Mrs. Potato protagonista direla; eta ikusgai dago, hemen:
70eko hamarkadara egingo dute atzera, eta garai hartako itxurarekin mozorrotuko dira auzotarrak. Horrela aterako dira balkoira 13:00etan, eta musikarekin berotuko dute guatekea. Ondoren, elkarrekin dantzatuko dute Boney M taldearen Daddy cool abestia, eta bideo bat grabatuko dute. Koreografia ikasteko, berriz, Youtubeko beste bideo bat ere zabaldu dute, hauxe:
Eta koreografia dantzatu ondoren, musika gehiago. Horretarako, abesti eskaerak bidaltzea eskatu diete auzotarrei, emailez.