Olatz irabazle, Lizeagako irrintzi lehiaketan

Kronika - Erredakzioa 2020ko mar. 30a, 11:17

Irrintzi lehiaketa antolatu zuten igandean Lizeaga auzoan. Eguerdiko 13:00ean, balkoitik balkoira irrintziak bota zituzten, eta Olatz izan zen, azkenean, irabazlea. 

Berroegialdia arintzeko beste neurri batzuen artean, Lizeaga auzoan irrintzi lehiaketa antolatu zuten pasa den igandean. Eguerdiko 13:00ean balkoietan elkartu ziren auzotarrak, irrintziak bota, eta denen txalo zaparrada artean, onena aukeratzeko.

Etxe bakoitzean, familia bakoitzeko kide bakoitzak irrintzi bat bota ahal izan zuen, eta Bonik eman zituen puntuazioak, finalera zein pasako ziren erabakitzeko. Irabazlea, ordea, denen txalo zaparraden artean erabaki zuten: Olatz izan zen ohore hori izan zuena.

Lehiaketarako proposamenak, whatsappez
Kronika bere webguneko Koronabirusa etxetik izeneko atalean ari da herritarrek bidalitako proposamenak biltzen. Berrogeialdiak iraun bitartean herritarrek egiten dituzten ekintzen berri edota herritarrek gainontzekoei proposatzen dizkieten ekintza eta erronken berri jasotzen ari da bertan, eta berrogeialdia bukatzean, gustukoenaren aldeko botoa eman ahal izango da.
Proposamenak whatsapp bidez bidali daitezke zenbaki honetara: 688 660 714. 
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!