2017ko udaberrian diagnostikatu zioten Ainhoa Jauregi hernaniarrari Hodgkin linfoma, bigarren haurra eduki eta gutxira. Koskor batzuk nabaritu zituen aurrena besazpian; lepoan atera zitzaizkion gero. Konturatzerako, kimioterapian murgildu beharra izan zuen.
Esperientziaren berri jaso du orain Parte de mi Vivencias personales en mi lucha contra el linfoma de Hodgkin liburuan. Amazonekin Kindle formatu elektronikoan lortu daiteke oraingoz, baina fisikoki ere argitaratuko du. Elkar dendetan eta web orrian izango da laster eskuragarri. Helburu garbi bat du: tabuei aurre egitea.
Laster hiru urte egingo ditu, Hodgkin linfoma diagnostikatu zizutenetik. Zer moduz zaude? Guztiz errekuperatuta?
Primeran nago. Gelditu gabe, beraz nigan seinale ona da hori. Fisikoki gaixotu aurretik baino lehenago nekatzen naiz... baina, oso ondo nago. Agian, adinak ere badu zerikusia.
Behin borrokan hasita, kimioterapiarekin bukatzea zenuen helburu. Baina liburuan aipatzen duzu ondorengo errekuperazioa uste baino mantsoagoa dela. Bukatu da etapa hori ere?
Baietz uste dut. Kimioa amaitu nuenean, pare bat hilabetetan bizitzari aurre egiteko prest egongo nintzela uste nuen. Baina azaroan bukatu nuen tratamendua, eta irailera arte ez nintzen hasi lanean. Indartsu, psikologikoki ere ondo, lanera itzultzeko eta seme-alabak hezteko gai eta lehen korrika egiten nituen 10 kilometroak pixkanaka-pixkana berregiten ikusten nuen nire burua. Azkeneko hau oraindik ez dut lortu. Gorputzak ez zidan nik espero nuen bezala erantzun. Ahul negoen, segituan nekatzen nintzen, artikulazioetako mina orain dela gutxi arte izan dut, eskumuturretan batez ere, gorabehera hormonalak kimioaren ondorioz (oraindik tratamenduan)... eta psikologikoki inoiz baino ahulago.
«Kulpa sentimendua emakume gehienok daukagun sentimendua da»
Tratamenduan negoen bitartean, eguneroko preokupazio arruntak albo batera utzi nituen eta amaitzean, hor neukan bizitza bere gauza guztiekin nire zain. Intseguritate haundiarekin gogoratzen dut momentu hori eta denbora luzea eman dit bizitakoaren kontzientzia hartzen; ez nekien kazetari izateko gai izango nintzen berriro, edo seme-alabak hezteko gai, bereziki, semearekin kontrola galdu nuelako batzuetan. Baina, liburu honek asko lagundu dit.
Gero, geratzen dira gauzak: ezpain ertzak irekitzen zaizkit, enziak ahulak dauzkat... Ni ere banaiz dena berehala nahi duen horietakoa, eta ez da posible. Egokitzapenerako denbora behar da.
Zure esperientzia kontatzea erabaki duzu, liburu batean, «terapia moduan», eta «beste norbaiti baliagarria egingo zaiolakoan». Zer moduzko harrera izaten ari da?
Egia esan oso ona, inguruan behintzat. Momentuz Kindle formatuan bakarrik dago eta horrek salmentak mugatzen ditu, noski. Baina eskaera gehienak liburu fisikoan dira, zorionez erromantiko asko dago oraindik. Ea laster argitaratzea lortzen dudan. Maketazio lanak ere nik egin ditut eta ez nekien nola hasi ere. Orain Amazonen Kindle formatuan dago. Eta Elkarrek liburuaren distribuzioa egingo du. Beraz, dendetan eta web orrian egongo da salgai.
Zenbat denbora eman dizu?
Ez naiz denbora guztian idazten aritu. Gaixo nengoenean ia egunero idazten nuen, ni askatzeko modu bat zelako. Gero, geldialdi bat izan nuen, eta berriro pentsatu eta egingo nuela erabaki nuen. Baina denbora asko da. Elkarrizketa edo albiste bat idazteak ez du zerikusirik liburu batekin. Dena irakurri berriro, forma eman... Lanean hastean ere ez neukan hainbeste denbora, eta hartu eta utzi ibili naiz. Baina ikasturte honetan hartu nuen berriro serio. Eta orain portadarekin ere ibili naiz. Unai Bellamyk egin dit argazkia, Bricomaniako argazkilariak, eta anaia, Zeelanda Berrian bizi bada ere, etorri da bi hilabete pasatzera eta berak konposatu du azala. Bestela, hor ariko nintzen oraindik!
Zure esperientziaren berri jasota, gerturatu zaizu gaixorik?
Ez zait gaixorik hurbildu oraindik. Egia da oraindik ez dudala lanketarik egin liburua jendearengana iristeko. Minbiziaren elkartetik deitu didate aurkezpentxo bat egiteko, baina ez naiz hasi lanketa egiten. Hala ere, irakurri duen jendeak esan dit orain hartu duela kontzientzia zer pasatu nuen. Ikusten nindutenean ondo neramala uste zuten.
Askotan tabu izaten da minbizia, eta zerorrek onartzen duzu zuk ere, gaixotu aurretik, ez duzula jakin nola jokatu beste gaixoen aurrean. Zure inguruan gertatzen zitzaizuna kontatzeak lagundu dizu prozesuan?
Ez dakit lagundu zidan edo ez, baina behintzat ez nuen zerbait ezkutatu behar nuenaren sentsazioa eduki. Behin asimilatuta, gaixotasuna, tratamenduaren ondorioak eta abar, naturaltasunez ematen saiatu nintzen. Minbiziaz normaltasunez hitz egin behar dugula uste dut, tokatzen zaigunean hain ezezaguna ez izateko behintzat. Ezjakintasunak beldurrak hareagotu besterik ez ditu egiten.
«Animikoki eta psikologikoki gaizki egoteak erraztu dezake horrelako gaitz bat edukitzea»
Hasieratik jokabide hau izatearen erruduna seguruenik Itziar izan zen. Liburuan askotan aipatzen dut ezinbestez. Nik baino lehenago hasi zuen tratamendua eta eskuzabaltasun osoarekin bere esperientziaren berri ematen zidan. Behar nuen informazio guztia erraztu zidan, aholku baliotsuak ematen zizkidan eta beti naturaltasun handiarekin tratatzen zuen gaia. Beregatik bakarrik sentitzen nintzen ulertua, hizkuntza berdinean hitz egiten genuen. Beti zituen hitz egokiak, beti zegoen laguntzeko prest, irrifartsu, indartsu... Batzuetan, bera ere gaixo zegoela ahazten zitzaidan.
Karga ere bihurtu daiteke, hala ere, ingurukoak aldiro galdezka edukitzea. Konpentsatzen du?
Bai. Jendearen interesa eskertzen da momentu horietan, ingurukoen maitasuna eta babesa oso garrantzitsuak dira. Eta, azalpen gehiegitarako ez zaudenean gehiengoa konturatzen da.
Ingurukoen laguntza, sare indartsu bat edukitzearen garrantziaz hitz egiten duzu. Eta laguntza onartzen ikasteaz. Ikasi duzu, benetan?
Laguntza lehen baino errazago onartzen dut, baina oraindik kosta egiten zait kasu batzuetan. Derrigorrez ikasi dudana da norbaitengan zerbait delegatzen duzunean bere egiteko modua ere onartu behar duzula.
Medikuen eta erakundeen aldetik jasotzen den arretan hutsuneak badaudela ere aipatzen duzu. Zeren falta sumatu duzu?
Medikuengatik egun kexarik ez dut. Zorte txarra izan nuen, eta sei hilabete horietan zehar mediku aldaketak tokatu zitzaizkidan. Neretzako hain ezezaguna zen prozesu horretan, egonkortasun bat bilatzen nuen, konfiantzazko harreman bat sortu.... Baina, azkenean ondo joan zen dena. Hala ere, diagnostikoa lortzeko ere gorabeherak eduki nituen medikuen arteko gaizki-ulertuengatik eta noski, ni ere deskonfiantza puntu batekin nindoan.
Erakundeei dagokionez, hutsuneak egon badaudela iruditzen zait. Batez ere seme-alaba txikiak izanik, senarra etxean geratu ahal izateko diru-laguntzak bota nituen faltan edo horren ezean, etxeko-lanetarako laguntza adibidez. Familiarik ez baduzu, ez daukazu laguntzarik. Baina orokorra da hori. Seme-alabak ere gaixotzen bazaizkizu, ez dago bajarik edo laguntzarik, ez bada depresioagatik hartuko zenukeena. Alde horretatik, iruditzen zait lege bat behar litzatekeela, etxean egoteko eskubidea izan dezazun, mendekotasuna duen pertsona bihurtu den hori zaintzeko.
Baina medikuei dagokienez, gauzak dauden moduan, Euskal Herrian ezin gara kexatu. Harreta oso ona izan da, eta erizain eta laguntzaileena da ikaragarria. Topera aritzen dira lanean eta irribarre batekin, gainera.
Medikuen gomendioez gain, bestelakoak ere bilatu dituzu; adibidez, dieta makrobiotikoa. Sentitu duzu sekula medikuen eta dietistaren arteko desadostasunik zegoenik?
Ez, desadostasunik ez. Medikuen aldetik, agian, dieta makrobiotikoarenganako sinesmen falta, baina kalterik egingo ez zidanez ez zidaten kontrakorik esan. Niretzako zerbait osagarria izan da. Nik nire bizitza ez nuen utziko zientifikoki konfirmatuta ez dagoen emaitzak dauzkan dieta baten esku. Nire minbizia motarengatik, banekien kimioarekin %80ko emaitza onak izaten zirela eta sendatuko nintzela. Niretzako osagarria da, alternatiboa baino. Makrobiotikoak lagundu dit sendoago eta indartsuago egoten, seguru nago. Janaria oso ondo toleratu dut eta ez dut botakarik egin. Lagundu zidan baita ere laugarren kimio saioaren ondoren garbi egoten. Medikuak ere harrituta zeuden. Eta pentsatzen dut dietak lagunduko zuela. Nik aholkatuko nuke, kalterik ez baitu egiten.
Segitzen duzu ohitura horiekin?
Ez naiz makrobiotika zalea, baina geratzen dira ohitura batzuk. Esnea adibidez, arrozarena edaten dut, edo ez dut ia haragirik jaten. Edo azukrea saihesten dut. Esaten da egungo pozoirik haundiena dela.
Zalantzak ere izan dituzu tratamenduaren inguruan. Horrelako egoera batean erabakiak hartzeko gai izan daiteke gaixorik dagoena?
Osasuna jokoan dagoenean erabakiak hartzea zaila da oso, batez ere informazio falta izugarria delako. Baina, informazioa bilatu daiteke, kontrastatu eta norberak bere ondorioak atera. Bizitza norberarena da eta iritzirik gabe zuzenean esaten dizuten pausuak ematea ere ez da batere erraza. Nik medikuen erabakiak eta gomendioak ulertzeko beharra nuen. Eta sentitu nahi nuen modu aktiboan zerbait egtien ari nintzela gaixotasunari aurre egiteko.
Gaixotasuna gogorragoa egin zaizu, ama zarelako. Zer moduz daude Ekaitz eta Nahia? Nolakoa da egun zuen harremana?
Askoz ere zailagoa, dudarik gabe. Gaixotasunari aurre egin behar nion, tratamenduari, neure burua zaindu eta nigan pentsatu, baina ez nintzen gai nire seme-alaben ardura besteengan delegatzeko. Eta horrek, buruauste haundiak ekarri zizkidan, animikoki asko eragin zidan. Orain, biak primeran daude. Ekaitzek guztiz gaindituta dauka etapa hori eta naturaltasunez hitz egiten du. Momentuan askatu zituen askatu beharreko guztiak eta nahiz eta nik oso gaizki eraman nuen, orain oso pozik nago horrela izan zelako. Nahia oso txikia zen. Eta, gure arteko harremana oso ona dela iruditzen zait. Konfiantza haundikoa, oraingoz... Gure haserrealdi, kasketa eta abarrekin, noski.
Eta Mikelekin, gurasoekin…? Ondorioak utzi ditu gaixotasunak?
Ez. Izatekotan onerako. Konfiantza haundiagoko harremanak sortu direla sentitzen dut orokorrean eta bikote harremana sendotu egin dela.
Kulpa sentimenduaz hitz egiten duzu: gaixo egoteagatik, ingurukoengan halako karga bat eragiteagatik, gaizki edo ez ulertua sentitzeagatik… Gainditzen da sentimendu hori?
Kulparen sentimentua emakume gehienek dugun sentimendu bat dela uste dut eta egoera hauetan areagotu egiten da. Besteak zaintzeko hezita gaude eta ez alderantziz. Kulpa sentimendua ez dut guztiz gainditu, karga bat izatearen kulpa hain zuzen ere; batez ere nire amak osasunean izan dituen ondorioak ikusita. Banekien pasako zela, eta ezin nuen ezer egin. Baina ama bezala ere ulertzen dut. Bere lekuan, berdin jokatuko nuke.
Gaixotu aurretik bizi izandako depresioak gaixotu zintuela diozu. Hodgkin linfoma eduki eta gainditzeak bizi ikuskera eta bizitzeko modua aldatu dizkizu?
Bai, nire prioritateak aldatu egin dira eta lehen baloratzen ez nituen gauza asko baloratzen ditut orain. Lehen beharrak nituen beti lehentasun eta orain, gozatzeko une gehiagorekin tartekatzen ditut. Nire inguruan gertatzen diren gauzak aldatu ezin ditudanez, ahalik eta hoberen eramateko lanketa pertsonala egiten dut. Animikoki eta psikologikoki gaizki egoteak erraztu dezake horrelako gaitz bat edukitzea, nire ustetan. Batek esan zidan Hodgkin linfoma berarentzako zela minbizia emozionala. Ziur nago emozionalki denok dena landuko bagenu, hobeto egongo ginatekeela. Prebentzioan ere egin behar da lan.
Noiz jasotzen da mediku alta? Nola bizi izan dituzu edo bizi dituzu errebisioak?
Alta gaixotasuna gainditu eta hamar urtetara ematen dute, Hodgkin linfomarekin behintzat. Azarora arte, errebisioak hiru hilabetetik behin eduki ditut eta lehenengo urtekoak batipat urduritasun puntu batekin gogoratzen ditut. Ez naiz obsesionatuta egon, baina eguna iristen zenean, urduri jartzen nintzen. Orain, sei hilabetetik behin egingo dizkidate, maiatzean dut hurrengoa eta orain, lasai joaten naiz. Errutinaren parte bihurtu dira. Ni ez nintzen gaixotzeko perfilekoa, baina begira. Egia da harritu gaituela 30-40 urte bitartean, haurdunaldi baten ondoren suertatzea horrelako kasu bat baino gehiago. Hala ere, medikuek ez dakite zerk eragiten duen.
Ez duzu kontakizun tristea egin nahi izan, eta bidea ondo amiatu duzu. Baina minbiziak eraginda hil direnen berri ere izan duzu tratamenduan zinen bitartean. Zer esango zenioke borrokan ari denari?
Ba, ezer gutxi egia esan. Bakoitzak ahal duen moduan eramaten baititu egoera hauek. Oso desberdinak gara denok. Nik emango nuken aholku bakarra da: norberak behar duen moduan eramateko prozesua eta ez besteek espero duten bezala. Jarrera baikorra oso lagungarria den bezala, 'bajoiak' ere onartu egin behar dira. Hauetatik ere ikasi eta indarberrituta ateratzen zara.