Denboraldi bikaina egin du Aritz Urdanpilleta txirrindulari ereñotzuarrak, eta lehengo urtean ere bikain ibili zen. Hori horrela, Euskal Selekzioak Espainiako BTT jaitsieren Txapelketarako deitu du. Panticosako eski estazioan jokatuko da txapelketa, igande honetan bertan.
Gaur bertan abiatuko da bertara, txapelketa jokatu aurretik zirkuitua ikusi eta entrenatzeko denbora pixka bat izateko.
Hau ez da Euskal Selekzioarekin parte hartzeko deitu dizuten aurreneko aldia. Ondo moldatzen zaren seinale, ezta?
Ez da lehenengo aldia, ez. Lehengo urtean ere deitu zidaten. Aukeraketa prozesua egiten dute urtean zehar lortutako emaitzak, momentuan nola ikusten zaituzten eta beste zenbait kriterio jarraituz. Pasa den denboraldian Openeko bigarren postua lortu nuen, eta horrek ere eragina izan du aurtengo deialdian.
Espainiako Txapelketan ariko zara. Ezagutzen dituzu aurkariak? Zer izango da zailena?
Ez daukat aurkari zuzenik. Ahal dudan mailarik onena ematen saiatuko naiz, eta gero, gerokoak. Nire ustez, zailena lasterketa eguneko nerbioak kontrolatzea izango da. Jendea begira eta kronometroa martxan jartzera dijoanean izaten diren urduritasunak dira okerrena, ez baitute daukazun guztia ematen uzten.
«Oso zirkuito fisikoa da; amaierara besoetako indarrak justu ditugula iristen gara»
Panticosako eski estazioan egin beharko duzue jaitsiera. Nolako ibilbidea da?
Ibilbidea lehengo urtekoaren antzekoa izango da. Hala ere, tramo berri batzuk sartu dizkiote. Oso zirkuitu fisikoa da; amaierara besoetako indarrak justu ditugula iristen gara. Horrez gain, baditu zenbait tramo oso teknikoak direnak, eta denbora benetan irabazten da tramo hauek azkar pasaz. Gaur ikusiko dugu zirkuitua oinez, eta ondoren larunbata entrenatzeko eguna izango da; igandean, berriz, lasterketa jokatuko da.
Nola entrenatzen da bat, horrelako probetarako?
Nire entrenamenduak astean zehar fisikoak izaten dira; bizikleta hartu eta pedalei emanez eta besoak landuz. Asteburuetan, edo libreago nagoenetan, aldiz, arlo teknikoa lantzen dut; zirkuitu batera joan eta bertan jaitsierak egiten ditut.
«Mundu mailan dabiltzan txirrindulari asko daude Espainian»
Zein helburu daukazu txapelketa honetan? Irabazteko aukerarik ikusten duzu?
Ez! Irabaztea ezinezkoa ikusten dut! Maila oso altua dago, mundu mailan konpetitzen dabiltzan txirrindulari asko daude Espainian, eta bestalde, aurten unibertsitateko lan asko izan ditut, eta ez dut behar den bezala entrenatzeko astirik izan. Nere helburua sub23 mailako lehen 15en barruan sartzea izango da. Baina horretarako gauzak oso ondo atera beharko zaizkit.
Proba honen ondoren, baudakazu besterik buruan? Euskal Selekzioarekin jarraitzeko aukerarik izango duzu?
Proba honen ondoren, abuztua lasai antzera hartuko dut. Ondoren, irailean Burgos eta Euskadiko Txapelketak jokatuko nituzke.