Gero eta gehiago dira, etxean bere maskarilla propioak egiten ari direnak; eta herritarrei lan hori errazteko, materiala jarri dute haien eskura, Goizuetan. Oihal berezi batzuk eta gomak eman dizkio herritar batek, Goizuetako Udalari, eta estankoan eskatu daitezke.
Etxe bakoitzeko, poltsa bana eskatu daiteke, eta bost oihal eta bi goma daude poltsa bakoitzaren barruan. «Baliteke gomarik gabeko poltsak egotea, hala ere, ez baitago oihal adina goma».
Tissu berezi batekin egindako oihaltxoak dira herritar horrek emandakoak, biodegradableak eta hidrosolubleak.
Maskarillak nola egin jakiteko, bideoa ikusgai
Material horrekin, oso erraza da maskarillak egitea. Nola egin erakusteko, bideoa jarri du Goizuetako Udalak, bere web orrian (goizueta.eus), maskarillen materialaren albistearekin batera. Bideoa ikusteko, egin klik hemen.
Emandako oihala bi ertzetatik tolestu (dagoeneko eginda daude tolesdurak) behar da, eta bakoitzean goma bana jarri, belarrietan lotu ahal izateko. 15-20 segunduko lana da.
Maskarilla hauek erabiltzeko gomendioak ere eman ditu Udalak: leku itxietan edo 2 metroko tartea mantentzerik ez dagoen lekuetan erabili; garbitu eskuak erabili aurretik eta ondoren; ondo estali ahoa eta sudurra, maskarilla eta aurpegiaren artean tarterik utzi gabe; gomatik hasita kendu; aldatu heze dagoenean edo hondatzen denean; ez ikutu aurrealdea, eta ikutuz gero, eskuak garbitu. «Argi izan ez dela babes ekipamendu bat, baina kutsaduraren hedapena mugatzen du. Maskarilla erabiltzeaz gain, eskuak ondo garbitu eta segurtasun distantzia mantendu», eskatu du.