Lau eguneko festa giroari errematea jarriko diote gaur, Ereñotzun: egun osorako egitarauarekin bukatuko dituzte San Antonio jaiak. Dianarekin esnatuko dute auzoa Hernaniko txistulariek, goizeko 08:30etatik aurrera, txoko guztiak alaituz. Eta ondoren, eguerdi partean, Ereñotzuko frontoian eta plazan elkartuko da jendea, zita bikoitzarekin: esku pelota partiduak jokatuko dituzte 11:30etatik aurrera, eta sagardo dastaketa hasiko da 12:00etan.
Bi partidu jokatuko dituzte frontoian. Aurrena, lau t'erdian ariko dira Iñaki Elola eta Iker Egiguren, elkarren kontra. Eta ondoren, binakako partidua izango da, bailarako lau esku pelotarirekin: Beñat Apezetxea eta Ekain Lizeaga batetik, eta Eñaut Lizeaga eta Antton Apezetxea bestetik. Dastaketan, berriz, zazpi sagardotegik hartuko dute parte: Elutxeta, Iparragirre, Elorrabi, Otsua-Enea, Olaizola, Goiko Lastola eta Larre Gain.
San Antoniotako azkeneko ekintza, ohikoa bezain erakargarria izango da: puntako bertso jaialdia antolatu dute, 18:30etan hasita. Taula gainean izango dira Maialen Lujanbio, Aitor Mendiluze, Nerea Ibarzabal eta Eñaut Martikorena. Bertso saioa bukatutakoan egingo dute errifaren zozketa, eta suziriak botako dituzte, aurtengo jaiei bukaera emateko.
