Lau eguneko festari errematea jarriko diote gaur Ergobin, baserritarren eguna ospatuta. Eta ez dira gutxi izango auzora gerturatuko direnak, ekintza potoloak prestatu baitituzte gaurko ere.
Idi-demak erakarriko du jendea goizean, Ergobiko Sariaren 57garren edizioarekin, Enrique Artolaren Aitor Matxainen eta Misiyuaren idi-pareak lehian direla. Jaietako bazkari ofiziala egingo dute ondoren, eta makina bat haur eta guraso elkartuko dira plazan arratsaldean, Kantu Kolore emanaldiarekin.
Modurik onenean agurtuko dituzte aurtengo jaiak, beste behin, su artifizialekin eta ekitaldi sorpresarekin.
Barkaiztegi nagusi atzo, Ergobiko Sagardo Txapelketan
Espero bezala, sekulako giroa izan zen atzo eguerdian Ergobin, 11:30etan hasi eta 14:00ak arte, Sagardo Txapelketarekin eta dastaketarekin. Sagardotegi partehartzaile guztien artean, zortzi sailkatu ziren finalera, eta Barkaiztegik jaso zuen puntuazio altuena azkenean (126). Tarte txikiarekin nagusitu zen, Oialume Zarren (124) eta Irigoien Herreroren (119) aurretik.
ERGOBIKO JAIETAN GAUR
ABUZTUAK 2O, Baserritarren eguna
11:00, Idi-dema, LVII. Ergobiko Sari Handia: Enrique Artola, Aitor Matxain eta 'Misiyua'
14:30, Bazkari ofiziala. Txartelak salgai, jaietako txosnan: helduek 35 euro, 16 urtetik beherakoek 20 euro.
17:00, Kantu Kolore haurrentzako emanaldia
Ondoren, DJ Etoo
23:00, Su artifizialak, jaiei bukaera emateko
23:30, Ekitaldi sorpresa
