San Isidro eguneko meza, idi proba eta baserritarrei omenaldia, bertsotan

Herriko baserritarrei aitortza egin eta eskerrak emateko, osatu duten bideoko irudietako bat.

Astigarragako San Isidro jaiarekin lotutako bi bideo daude ikusgai, astigarraga.eus web orrian: baserritarren omenezko bideoa, eta bertso saioa.

Ez zen ohiko San Isidro eguna izan, joan den ostiralekoa, Astigarragan. Baina ospatu nahi izan zuten, nola edo hala, baserritarrak omentzeko jaia.

Eta baita egin ere. Batetik, bertso saioa izan zen interneten, zuzenean, Onintza Enbeita, Nerea Elustondo, Andoni Egaña eta Sebastian Lizaso bertsolariek Astigarragako San Isidrori eskainitakoa, Agin Laburu astigartarra gai-jartzaile zela. Saio hori, astigarraga.eus web orrian ikusi daiteke orain, Aktualitatea ataleko Albisteak txokoan sartuta. Ordubete pasatxoko saioan, denetik izan zuten hizpide bertsolariek: Foru Plazako eta Zamalbideko San Isidro, idi probak eta animalistak, apustuak, baserritarrei omenaldia eta emakumeen papera, festaren ondorengo ohiko afaria Lizeaga sagardotegian...


Baserritarren omenezko bideoa, Udalak eta Goldeak

Bertso saioa antolatu ez ezik, beste zenbait ekintza ere pres­tatu zituzten ostiralean Asti­ga­rragako Uda­­lak eta Goldea El­kar­teak, San Isidro egunerako. Horrela, bideo bat osatu zuten, herriko baserritarren ome­nez; eta ber­tan ageri dira Laga­txa­ga­ko Ma­ri Carmen eta Antonio; Lizardi Loreakeko Lourdes, Esti­­txu eta Jasone; Elio-Eneko Ina­xio; Larrabiko Juani eta Jose­txo; Plazetxeko Jabier eta Egoitz; Taulako Elena eta Delfin; Asti­baratzeko Egoitz; eta Lizardiko Jabi. Bideo hori ere, ikusgai dago  astigarraga.eus web orrian, Al­bis­teen txokoan.

Gainera, egunean bertan, uda­­letxeko fatxada bereziki apain­du zuen Udalak, San Isi­dro eguna ospatzeko, eta hala egi­teko eskatu zien Herri Esko­la­ko ikasleei ere, etxeko leiho eta bal­koietan: barazkiak, otarrak, baserriko tresnak, marraz­kiak... ipini zituzten. Eta Foru Plazan, azkenik, barazkiekin egindako figuren erakusketa jarri zuten.