Demografia Saretzen

Biztanle gutxiago baina gazte gehiago, Aranon

144tik 114ra jaitsi da biztanleria, baina ia bikoiztu egin da 20 urtetik beherako gazteen kopurua.

Mendi inguruetako herri txiki askoren joerari ezin kontra egin, beherantza egin du Aranoko biztanleriak ere, azkeneko bi hamarkadetan. 144 biztanle ziren 2001ean, eta bi gehiago 2002an (146); baina ordutik, behera egin du bizilagun kopuruak, 2021ean 114 izateraino. Dena den, azkeneko urteetako datuei erreparatuta, badu berpizkunde baten traza. 2015ean jo zuen behea, 108 biztanlerekin; eta ordutik gorantza egin du pixka bat.

Bada beste datu bat ere, herria biziberritzeko bidean pozgarria: gora egin du 20 urtetik beherako gaztetxoen kopuruak, azkeneko urteotan. Horrela, 2007an bederatzi bakarrik izatetik, 2021ean 20 izatera pasa da.

Kontrakoa da joera, 20-59 urte bitartekoetan, eta horretan gertatu da beherakada nabarmena: 88 izatetik 57 izatera pasa dira bi hamarkadatan. 60 urtetik gorakoen kopurua, berriz, mantendu egin da, gutxi gorabehera: 41 ziren 2003an, eta 2021ean 37.

Heriotza kopurua, gainera, jaiotzen bikoitza izan da Aranon, 2001-2021 epean: 18 jaiotza, eta 36 heriotza.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!