Zita bikoitza izango du Hernanik asteburu honetan Donostiako Atano pilotalekuan. Bi final izango dira gainera, eskuz binakakoak, ostiralean arratsaldeko 19:00etan: kadeteen lehenengo mailan Ekhi Galdos eta Hegoi Zabala (22-14, Lazkaoren aurka); eta jubeniletan Ekhi Oses eta Lier Zugasti (Zarautzeko bikotea garaitu zuten finalerdian, 22-9). Behar Zana klubeko pelotariak izango dituzte aurkari, bai kadeteek eta baita jubenilek ere.
Nagusietan, Xabi Apaolazak, Iñigo Erlek eta Markel Lizeagak Ohorezko Mailari eustea lortu dute, Lazkaori 22-13 irabazita; eta Iturbe-Oiartzabal-Azpeitiak Bigarren Mailara igoera jokatuko dute ostegunean, 20:00etan Hernanin, Danok Baten aurka.
Lau t'erdiko txapelketan, bidea amaituta goizuetarrek
Profesionalen kasuan, Serie B mailako lau t'erdiko txapelketan murgilduta zeuden bi goizuetar, Beñat Apezetxea eta Iker Salaberria alegia. Ligaxkako fasean, Apezetxea hurrengo fasera pasatzeko aukerarik gabe zen, Salaberriaren beraren kontrako partidua galdu ondoren (22-11). Salaberriak, berriz, ligaxkako hirugarren partidua irabazi behar zuen pasa den igandean, Rekalderen aurka, semifinaletara pasatzeko; baina galdu egin zuen goizuetarrak, 22-18.