Pelota izanen da protagonista gaurkoan Goizuetan, bertan jokatuko baitituzte Umore Onako kideek 5 partidu; denak eskuz binaka, Nafar Jokoen baitan. Partiduak hasiko dira arratsaldeko 18:00etan: Makazaga eta Zubiri hasiko dira Txarutaren aurka (Aizagirre-Oscariz), seinen lehenengo mailan; jarraian ariko dira Larralde eta Olaizola, Aldabideren aurka (Agirre-Remiro), kimuen lehenengo mailan; ondoren ekingo diote Goizuetak eta Lujambiok, Arkupe Pelota Elkartearen aurka jokatzeari, kimuen lehenengo ligaxkan; kadeteen bigarren mailako partidua jokatuko dute gero Kuryanovych anaiek, Oberenaren kontra (Serrano-Andueza); eta azkenik, gazteen bigarren mailan ariko dira Sagardui eta Salaberria, Leitzaren aurka (Zugasti-Iturrino).
Jaialdia Astigarragan ere, eskuz zein palaz
Astigarragako Txomiñene frontoian ere izango da jaialdia, eskuzko zein palako partiduekin, denak ere Gipuzkoako Txapelketari dagozkionak. Ansa-Ormazabal jubenilek osatutako bikoteak irekiko du jaialdia, eskuz binaka, bosgarren jardunaldiko partiduarekin: liderren kontra ariko dira, Aurrera taldearen aurka. Beloki-Etxeberria nagusien bikotearen txanda izango da jarraian, haiek ere bosgarrena jokatzeko, Oteizaren aurka. Eta jaialdiko azkeneko partiduan, palara pasako gara: Luluaga eta Urdangarin ariko dira, Aiaren aurka.