Antiguako Txapelketaren finalean ariko da Eñaut Lizeaga astigartarra, Asier Balerdirekin batera. Asteartean lortu zuten horretarako txartela, semifinalean Cestau eta Bernaola menderatuta (22-17). Zenbait tantoren aldea izan zuten Lizeagak eta Balerdik partiduan zehar, baina kontrarioek lehenengoz hartu zieten aurrea 16-17koarekin. Hortik aurrera, baina, erabat nagusitu ziren, garaipena lortzeko.
Gaur izango dute finala, goizeko 11:00etan hasita, Antiguako frontoian; eta Etxeberria eta Apeztegia izango dituzte kontrario. Hain juxtu, haiek Xabi Apaolaza hernaniarrari eta Oier Elorzi irabazi zieten asteazkenean, bigarren semifinalean (22-11). Parekatua izan zen partidua aurreneko erdian, eta 5-8 ere izan ziren aurretik Apaolaza eta Elorz; baina 11na berdindu ondoren ezin izan zieten eutsi.
Alize Sagarduik zita bikoitza asteburuan, Udako Masterraren ligaxka bukatzeko
Alize Sagardui goizuetarra, bere aldetik, Udako Masterra ari da jokatzen asteotan, elite mailan, Nora Mendizabal andoaindarrarekin batera. Ligaxkako A multzoan ari dira, eta azkeneko jardunaldiak jokatuko dituzte asteburu honetan, Urrezko Ligara zein bikote sailkatuko diren erabakitzeko.
Plentzian ariko dira gaur, arratsaldeko 19:00etan hasita, Arrizabalagaren eta Zabalaren kontra. Eta Bakion jokatuko dute bihar, ordu berean, Etxegarai eta Bergara kontrario dituztela.