Atzo goizean hasi ziren Martindegiko San Ferminak, ohiko familia giro beroarekin, kalejiran, hamaiketakoa elkarrekin eginez, jolasean... Aurtengoan izan da nobedade bat haurren jolasetan, Asintxio Barrenetxeak proposatuta; eta «zerbait berria» egiteko aitzakian, gaztetxoak sagardogintzarako 'erreklutatzeko' lanekin hasi dituzte festak: sagar biltzen jarri zituzten adin guztietako haurrak!
Bromak alde batera utzita, zein baino zein gustorago aritu ziren txikienak, nola jolasetan, hala puzgarrietan edota tiro karabina lehiaketan. Eta helduak ere pozik, nola ez! Herri kirol saioa ederrarekin eta erromeriarekin borobildu zuten eguna, etzi arte atseden hartu aurretik.
Ostiralean helduko diete berriro jaiei, arratsalde intentsoarekin: Andoni Magoaren emanaldia, puzgarriak, tortilla lehiaketa, sagardo dastaketa eta Laket taldearekin erromeria.