Larrialdi Plana osatu eta martxan jarri du Añarbeko presak, eta bihar goizean egingo ditu azkeneko probak, plana behin betiko indarrean jartzeko: aktibatuko dituzte presaren eta Ugaldetxoko eremuaren artean dauden herritarrei abixatzeko lau sirenak. Goizeko 09:00etatik 13:00etara bitarte izango da hori.
Lau orduko tarte horretan, aktibatuko dituzte Larrialdi Planean aurreikusitako egoerak; besteak beste, azpiegituraren segurtasuna edo funtzionamendua arriskuan jarri dezaketen egoerak: uholdeak, lurrikarak, hornidura elektrikoaren akatsak, iragazketak, sabotaje edo bandalismo ekintzak, pitzadurak egituran edo zimenduan, anomaliak hustubide-organoetan, prezipitazio bortitzak, uhate edo balbulen haustura, egiturazko ezegonkortasunak, lurjausi, harri-jausi edo elur-jausiak...
Hernaniko Udaltzaingoak eta Nafarroako Foruzaingoak hartuko dute parte simulakroan, «seinale akustikoaren funtzionamendu egokia gainbegiratzeko eta simulakroa egiten den bitartean herritarrek egin ditzaketen kontsultei erantzuteko».
Simulakroaren helburua da alerta-sistemaren eraginkortasuna egiaztatzea, ziurtatuz sirenak entzungo direla kaltetutako eremuetan, eta neurtuz kontrol puntuetako soinu-maila. Larrialdi Planeko prozeduren aktibazio zuzena ere ebaluatuko dute.
Larrialdi Plana etxez etxe banatu dute uholde-arriskuko eremuetan, ebakuazio batek eragin ditzakeen herritarrak informatzeko; eta era berean, koordinazio bilerak egin ditu Añarbek Urumearen arroaren ertzeko udalerrietako (Goizueta, Arano, Hernani, Astigarraga eta Donostia) larrialdi-zerbitzuekin.